Kralendijk- Djárason 19 di mei sindikatonan di e reunion organisá (ABVO, ACOM, NAPB i STrAF) i e dunadó di trabou ku mandato na nòmber di minister di Asuntunan Interno i Relashonnan den Reino (BZK), a yega na un resultado di negosiashon tokante e areglo di penshun i kondishonnan laboral pa ámtenarnan di Reino na Hulanda Karibense, pa un periodo di tres aña.

Un tópiko importante durante di e negosiashon tabata akumulashon di penshun. Esaki ta bou di preshon pa motibu di e situashon ekonómiko ku a empeorá i prinsipalmente e desaroyo di interes ku esaki ta trese kuné. E organisashon ehekutivo di “Pensioenfonds Caribisch Nederland” no por realisá e akumulashon di penshun di 1,75% pa aña manera palabrá mas, ku e interes abou aki. Mester di esaki pa na momentu ku yega edat di kobra penshun, yega na un entrada di mas o ménos 70% di e salario promedio ku ta igual  na 40 aña di labor.

Ku e areglo di penshun aktual, trahadónan lo por haña nan ku un retraso grandi den entrada ora nan baha ku penshun. Pa prevení esaki e partnernan di negosiashon a yega na e siguiente palabrashonnan: un subida di edat pa baha ku penshun te ku 66 aña entrante 2030, un limitashon den akumulashon di penshun te ku un entrada anual di $47.500 máksimo i modernisashon di penshun di invalides. Ku esaki ta prevení e retraso den entrada a término i no mester subi e prima di penshun.

Kondishonnan di labor

Banda di e medidanan pa mantené e penshun palabrá, sindikatonan huntu ku e dunadó di trabou ku mandato, a yega na un resultado di negosiashon pa un pakete di kondishon laboral pa tres aña. E pakete aki ta enserá entre otro un kompensashon di un solo biaha den 2021, redukshon di durashon di labor te un siman di labor di 36 ora i un kompensashon pa ámtenarnan di Reino den Hulanda Karibense ku profeshon riskante, entrante 2022.

Kupo di trabou nobo

Redukshon di durashon di labor ta krea mas o ménos 50 kupo di trabou nobo riba e tres islanan di Hulanda Karibense. Esaki tabata hopi importante pa sindikato i e dunadó di trabou logra, prinsipalmente pa motibu di e konsekuensianan ekonómiko di Covid-19.

Konsulta ku sostenedónan

E partidonan konserní a konkluí ku na mesa di negosiashon a logra un resultado balansá ku awor por presentá na nan sostenedónan.