ORANJESTAD/THE BOTTOM- St. Eustatius i Saba desde komienso di e siman aki ta kombatiendo un brote basta pisá di Covid na e isla. 

Na Saba e kantidatnan di kasonan a subi poko poko, pero sigur, te ku a yega un total di 28 kaso aktivo riba djaweps. Esaki, lógikamente ta un kantidat basta grandi pa un isla di masomenos 2000 inhabitante i ku no tabata tin niun kaso di Covid pa hopi luna tras di otro. 

Gezaghèber Jonathan Johnson djaweps anochi a auninsiá ku e isla ta bai nivel di riesgo 3, ku implementashon di vários medida pa purba kontené plamamentu di e virus. Segun Johnson a splika, kasi di tur kaso e fuente di kontagio ta konosí. Solamente den 1 kaso, no ta completamente sigur di unda e persona a pega.

St. Eustatius

Na St. Eustatius e situashon ta mas severo. Den apenas 48 ora, e isla a bai di zero kaso na 26 riba djaweps. Un total di 207 hende a wòrdu yamá pa pasa tèst djaweps, di kual 24 a resultá positivo. Esakinan ta bin riba e dosnan ku a konstatá djarason i djamars. 

Un echo importante ta na St. Eustatius ku e fuente di kontagio no ta konosí. Entre otro esaki a pone ku komisario Alida Francis a anunisá mesora nivel 5 di riesgo, ku ta nifiká diferente restrikshon basta pisá. Entre otro a kanselá tur evento ku tabata planeá pa kambio di aña. Otro aspekto ku ta kousa preokupashon ku St. Eustatius tin un grado di bakunashon hopi abou: apenas 50% di habitante ta ful bakuná. Hopi hende riba e isla, ku te asina leu a keda liber di Covid-19 pa hopi luna, ta kere mas den remedinan di kas òf bebementu di te di blachinan natural ku nan ta yama ‘bush tea’’. 

Koperá

Ambos gezaghèber Johnson komo komisario Alida Francis a hasi un apelashon riba habitantenan pa koperá ku e medidanan ku a anunsiá, i tambe ku ehekushon di e estudio di fuente i kontakto.