Tourism Corporation Bonaire ta kontinuá ku mas bishita di prensa internashonal

Kralendijk – Tourism Corporation Bonaire (TCB) tabatin mas bishita di prensa durante luna di ougùstùs. Komo parti di e ‘Tourism Recovery plan’, TCB ta enfokando riba atrae prensa internashonal na nos isla. Esaki ta un bon manera pa duna Boneiru mas kobertura internashonal den medio di komunikashon ònlain.

Dia 18 di ougùstùs 2021, TCB a yama bon bini na Elliott, kende ta un fotógrafo i videografo di biahe i estilo di bida for di California, huntu ku Leslie, kende ta un periodista independiente di biahe ku su trabou a wòrdu publiká riba entre otro TravelPulse.com i Arizona Foothills Magazine. Nan bishita na Boneiru lo wòrdu kubri den Travel Pulse (alkanse: 227.465), kual ta un plataforma ònlain ku ta ofresé notisia industrial, kontenido di video i ta duna informashon di biahe.

Ademas, a risibí bishita di Matthew, kende ta un eskritor independiente di Miami i ku tambe ta un eskritor pa Matador Network (alkanse: 793.456), kual ta un plataforma di biahe konosí mundialmente pa e aventurero moderno, i ku ta duna informashon di biahe, kulinario i eventonan lokal. Tambe, e bishita di Matthew lo wòrdu publiká riba e wèpsait di Thrillist.com (alkanse: 3.607.069), un plataforma onlain popular di notisia ku ta mundialmente konosí den e área kulinario, bebida i biahe. Matthew a bishitá Boneiru huntu ku Laura, kende ta un fotógrafo, spesialisá den fotografía di biahe, i ku su trabou a aparesé den katalòk di National Geographic. Laura ta un periodista di potrèt pa mas ku 20 aña i ta dedika su mes na eksplorando mundu, dor di kapturá i skibi tokante su eksperensia.

Durante di nan estadía na Boneiru, nan tabatin e oportunidat pa eksperensiá diferente aktividat, a hasi un paseo rònt di nos isla i a bishitá diferente restorant.

Entre 11 pa 18 di ougùstùs, e programa di televishon Hulandes Mooi TV a filma na Boneiru, mustrando diferente sitionan, akitvidatnan i akomodashon ku nos isla tin pa ofresé. E tim a disfrutá di nan bishita i a komparti nan eksperensia riba Instagram. Por mira algun ‘highlight’ di nan bishita riba nan página sosial ku tin 48 storia di nan estadía na Boneiru: https://www.instagram.com/stories/highlights/17934799015613075/

E episodio di Boneiru lo pasa na Mooi TV riba e kanal national SBS6 riba djasabra 2 di òktober 3:30 di atardi, orario di Hulanda, i 9:30 di mainta, orario di Boneiru. Ku ripitishon riba djadumingu 3 di òktober 11:30 di mainta i 6 di òktober 9:30 di mainta.

TCB ta yama danki na tur partner pa nan kolaborashon durante e bishitanan di prensa.

Lesa tambe:

• 
  Sterilisashon di kachó i pushi ta keda grátis na Boneiru 
• 
  Hòmber ta muri na Blue Bay despues di kaida ku frishidèr 
• 
  Paga tinu riba uso di awa | Aviso
• 
  Lider sindikal di St. Eustatius Charles Woodley a bishitá su koleganan sindikal na Boneiru
• 
  Konseho insular ke kompanianan manera Western Union i Moneygram bèk na Boneiru