Kralendijk, Segun WEB N.V. a komuniká, e trabounan di kobamentu pa ku renobashon di e liña di irigashon ku ta transportá awa purifiká bèk pa hotèlnan, lo keda finalisá na mei.

E kontratista Bonairiaanse Wegenbouw Maatschappij (BWM) ainda mester koba mas o ménos 350 meter i drecha mas o ménos 1.300 meter di karetera.

E trabounan di kobamentu a avansá te ku Kaya Gobernador N. Debrot, na altura di Kaya Endeavor i Kaya Carlos A. Nicolaas. Abitantenan por eksperensia molèster di stòf i zonido temporalmente. WEB i BWM ta hasi lo máksimo pa evitá esaki mas ku ta posibel.

Kaya Gobernador N. Debrot ta keda temporalmente disponibel pa tráfiko lokal. Pa tur sobrá tráfiko tin un ruta alternativo ku ta keda señalá pa medio di bòrchinan. Nos ta konsehá tur outomobilista pa hasi uzo di e ruta aki mas tantu ku ta posibel. Kore trankil i tene kuenta ku tempu èkstra pa yega bo destinashon.

Progreso

Na komienso di yüli 2020 WEB komo supervisor a start ku e proyekto pa renobashon di e liña di irigashon ku mester transportá e awa purifiká bèk pa hotèlnan (proyekto 9e EDF). For di e momentu ei BWM a koba riba un distansia di 9,7 kilometer. Esaki ta mas ku 95% di e kantidat total di kilometer. E kontratista falta pa koba mas o ménos 350 meter i drecha mas o ménos 1.300 meter di karetera.

Finalisashon i traspaso

Despues di finalisá e trabounan, lo tèst e liña di irigashon i poné den funshon durante un periodo di prueba. WEB lo suministrá e awa di irigashon na un preshon di 4 t/k 6 bar na klientenan ku tin un instalashon ku ta di kùr. Por dura algun siman promé ku e liña por operá korektamente.

Despues di e periodo di prueba i aprobashon di operashon di e liña di irigashon, lo hasi traspaso di e proyekto 9e EDF na Openbaar Lichaam Bonaire (OLB).