WILLEMSTAD –  Durante un operashon resien Wardakosta di Kòrsou, riba òrden di Ministerio Públiko (OM), a konfiská 29 gai di pelea. E akshon aki a tuma lugá durante un kontrol  rutinario riba un boto ku a bini di Aruba i ku Sentro di Opershon Marítimo (MOC) di Wardakosta a detektá 31 di yanüari.

A manda un boto di patruya Metal Shark na e boto, kaminda miembronan di wardakosta a ehekutá un inspekshon i kontrolá e dokumentonan na bordo. For di e papelnan a resultá ku e boto lo a eksportá 37 galiña i gai bibu pa Kòrsou, pero en realidat tabatin 29 gai di pelea na bordo. 

E tripulashon a indiká ku nan destinashon final tabata Boneiru i no Kòrsou. Tantu Kòrsou komo Boneiru ta prohibí importashon di gai di pelea. 

Despues di e kontrol Wardakosta, den konsulta ku OM, a ofresé e kapitan dos opshon: bolbe Aruba ku e gainan òf laga Wardakosta konfiská nan. Despues di a konsultá ku  doño di e gainan di pelea na Boneiru, e kapitan a disidí di entregá e bestianan. Seguidamente a konfiská e gainan riba òrden di OM. Despues di a konfiská nan a entregá e bestianan na Servisio Veterinario.