KRALENDIJK – Inventario digital di infrastruktura ta fundamental pa modernisashon di e ret di WEB. Den e promé siman di yüli te ku fin di òktober 2023, Water- en Energiebedrijf Bonaire (WEB) huntu ku miembronan di e tim di VERICO / eSmart Systems lo hasi e inventario di WEB su infrastruktura kompleto riba e isla di Boneiru.

Tokante e proyekto

E proyekto lo keda lansá riba 12 di yüli na Belnem. Unabes ku e inventarisashon ser kompletá den e bario aki e tim di proyekto lo sigui den otro áreanan riba e isla.

E proyekto ta konsistí di saka potrèt di resolushon haltu di e infrastruktura kompleto, inkluyendo mast, unidatnan di transformatòr, kabelnan di tenshon haltu na sitionan privá òf públiko, meternan- di awa i sistemanan di kloaka.  Tur potrèt lo ser analisá dor di un sistema ku ta hasi uso  di un kombinashon di lenguahe i prosesamentu visual pa komprondé imágennan i generá deskripshon tekstual di nan di forma outomátiko. Despues di esaki tur potrèt i dato lo ser  transferí den  un Sistema di Informashon Geográfiko (GIS). Esaki lo ta instrumental den optimalisashon di WEB su infrastruktura i pa adaptá di un manera eksitoso na e  kresementu di futuro , tendensianan nobo riba tereno di energia i maneho duradero di awa.

Den futuro, WEB lo por proveé kliente i kontratistanan ku informashon mas eksakto pa plannan di konstrukshon, realisá trabounan di mantenshon i maksimalisá invershonnan di kapital pa loke ta trata seguridat, konfiabilidat i aksesibilidat pa klientenan riba e isla.

WEB lo anunsiá den ki bario e tim lo ta aktivo i lo mantené abitantenan informá periódikamente tokante e desaroyonan di e proyekto via di e kanalnan ofisial di komunikashon.