Philipsburg- E kompania Winair temporalmente no por ehekutá buelonan pa entre otro Aruba, Boneiru ku Kòrsou dor di problemanan operashonal na e kompania Air Antilles.

Winair ta dependé di avionnan ATR di Air Antilles pa por bula rutanan mas largu, ku no por ehekutá ku su avionnan Twinotter. Den un relato di prensa den transkurso di djasabra, Winair a informá ku pa ‘motibunan operashonal’ no por hasi buelonan ku e ATR-nan te dia 7 di sèptèmber.

Problema

Di otro fuentenan Awor Bonaire ta komprondé ku e problema na Air Antilles ta basta serio, ya ku outoridatnan di aviasion di Fransia, a disidí di supsendé pèrmit di Air Antilles, pa motibu di violashon pa loke ta traha mantenshon di e avionnan.

Den dianan benidero ta spera mas informashon tokante e situashon na Air Antilles, ku ta un kompania privá situá na Guadeloupe. Banda di buelonan pa e islanan ABC, Winair ta hasi uso di Air Antilles pa buelonan entro otro pa Haiti i Republika Dominikana.

Solushon

Segun Winair a skibi djasabra, e kompania ta buskando un solushon ainda pa e situashon ku a surgi na Air Antilles. Sinembargo, Winair no tin masha opshon, ya ku e kompania mes tambe ta pasando den algun momento ménos faborabel pa loke ta traha di su situashon finansiero.