KRALENDIJK – Riba dianan 15 i 16 di mart próksimo, NGO Platform Bonaire den koperashon ku Oranje Fonds lo organisá e di 14 edishon di BON DOET, e akshon di mas grandi di boluntario na Boneiru. E aña aki organisashonnan sosial ta ofresé un total di 79 djòp durante BON DOET i ta invitá boluntarionan pa bin duna un man i yuda e organisashonnan.

Pa e organisashonnan sosial i fundashonnan lokal BON DOET ta un bon oportunidat pa organisá algun djòp of aktividat ku èkstra boluntario i medionan finansiero. I di otro banda BON DOET ta duna oportunidat na boluntarionan pa siña konosé e organisashonnan den nos komunidat. Ademas por usa e dianan aki pa forma bo grupo di amigu, kolega of famia pa hasi bon i pasa bon!

BON DOET ta sirbi tambe pa yuda generá boluntarionan nobo pa organisashonnan lokal. Loke ta kuadra tambe ku e tema di e aña aki kual ta ‘Konektá’.

E team di BON DOET ta hopi kontentu ku e anunsio di Kolegio Ehekutivo ku nan lo duna oranan disponibel na amtenarnan di OLB ku ke duna un man na organisashonnan riba djabierne, 15 di mart, i nos ke pidi otro organisashon i instansianan lokal tambe pa kopera pa nan trahadónan por partisipa na BON DOET 2024.  

Boluntarionan, boso ta mas ku bon biní pa yuda ku e djòpnan di BON DOET.  Riba e website di BON DOET tur e djòpnan ta deskribí i por skohe for di dje. Invitá bo kolega, amigu òf bisiña pa partisipá huntu ku bo i inskribí awe mes pa boso tambe ta ON.

Pa inskribí  por bai riba www.bondoet.com i skohe pa e parti di “Boluntario”. Klek riba “Buska un Djòp” i skohe e djòp ku bo ke bai hasi. Yena bo nòmber i demas informashon na e djòp aki i bo ta ON.

Si tin kualke pregunta por tuma kontakto via telefon 717 2366 òf 777 2366 of manda un mail na ngo.bondoet@gmail.com