PARAMARIBO – Minister di Finansas i vise promé minister Sigrid Kaag tin un kòmbersashon awe mainta ku e presidente di Sürnam Chan Santokhi tokante e despensa Hulandes pa e pasado di sklabitut.

Ta hiba e kòmbersashon den e ofisina di e presidente na Paramaribo. Santokhi a diskutí djaweps den Asamblea Nashonal  e último desaroyonan rondó di e pidimentu di despensa.

Ounke gobièrnu Hulandes ainda no a informá Sürnam ofisial tokante e pidimentu di despensa, Santokhi a bisa den un reunion di no tin opheshon kontra esaki.

Señora Kaag lo papia tambe ku algun minister i miembro di parlamento di Sürnam. Banda di esei e lo duna un splikashon di e plannan di  gabinete pa e pidimentu di despensa riba djaluna 19 di dezèmber.

Te ku awor representantenan di gobièrnu Hulandes  ta papia ketu bai di un mensahe “signifikativo” en konekshon ku e pasado di sklabitut. “Segun mi 19 di dezèmber ta bai inisiá un trayekto pa pidi despensa”, Santohki ta bisa.

E presidente a asentuá ku no ta promé biaha ku Hulanda i Sürnam ta papia di despensa i e pasado di sklabitut. Durante e bishita ku Rutte a hasi na Sürnam na sèptèmber e promé minister Hulandes a bisa ku pa loke ta trata su persona aña 2023 mester ta dediká na  rekonosimentu di sufrimentu di sklabitut.