KRALENDIJK – E debate durante ‘News Cafe’ a kuminsá ku hopi entusiasmo djabièrne pasá na Terramar Museum. Tres panelista i e públiko a kòmbersá ku otro tokante e balanse entre laman komo patrimonio protehá i komo motor tras di ekonomia. Diferente puntu a bini dilanti pero e tabata remarkabel ku kolaborashon entre hende i organisashon i partisapashon di e komunidat lokal ta nesesario pa salvaguardiá patrimonio kultural i e rikesa natural di Boneiru. 

E evento akí ta forma parti di vários aktividat ku Wereld Natuur Fonds i Terramar Museum lo organisá e dos aña benidero. E organisashonnan akí ke pa tur hende karga orguyo i respèt pa laman huntu kuné ku e meta final pa protehá laman konhuntamente. Panelistanan Elvis Martinus, Emma Pratt i Liliane de Geus a kompartí promé ku e debata a kuminsá nan memoria baloroso di laman. Despues e públiko a hasi pregunta i duna nan opinion. 

Tur hende tabata di akuerdo ku por traha riba un balanse mihó entre aktividatnan ekonómiko i protekshon di naturalesa si ta adaptá konosementu di hende lokal. E kombinashon di konosementu lokal i informashon sientífiko por hasi e diferensia. Elvis Martinus: “Sigun tradishon Boneirianunan ta tuma solamente lokual nan mester for di naturalesa.”. Mester siña norma i balor di nos isla na e generashon nobo, pero esaki mester ser kompartí ku turistanan tambe.

Kolaborashon

Ademas Liliane de Geus a enfatisá e impakto di kambionan sosial. A para sierto medinanan di protekshon ora Boneiru a bira un munisipal èkstraordinario di Hulanda. “Nos bos no tei mas, nos a duna otro hende permit pa representá nos.” sigun de Geus. Emma Pratt ta di e opinion ku kolaborashon ta importante i Piskabon ta un ehèmpel eksistoso di esaki. E koperashon akí ta envolví piskadónan ku tin konosementu di diferente generashon, pa hasi e sektor di peskamentu mas duradero i pa hasi naturalesa mas resiliente.