KRALENDIJK – Grandinan na Boneiru ta reakshoná positivo riba e proyekto di arte ‘Kunst door de brievenbus’, Arte den brivenbùs, na Hòfi Kultural. Djabièrnè siman pasá un grupo di hende grandi i boluntarionan a bini huntu pa finalisá e proyekto.

Arte den brivenbùs, Kunst door de Brievenbus, ta pa grandinan ku pa diferente motibu no por bini Hòfi Kultural tur ora pa asistí na e aktividatnan pa grandinan.

Sea pasobra nan no por kana bon, òf no tin transporte òf no tin sufisiente energia. Pa e motibu ei e grandinan aki hopi biaha tambe tin ménos kontaktonan sosial, segun e organisashon prinsipal Fundashon Plataforma Kultural.

Na kas

Durante e proyekto aki Hòfi Kultural ta bini tur luna ‘serka e grandinan na kas’, depositando un tarea kreativo agradabel den kada ken su brivenbùs personal.

E tareanan ta vária. Por ehèmpel mester traha un dibuho di algun produkto ku tin den frishidèr. Of tin un tarea ku un plachi di klùr i mester traha un “bestia inventá” ku artíkulonan for di lachi di potoshi.

Konfiabel

A start  e proyekto na luna di ougùstùs aña pasá ku 25 partisipante. A entregá kada tarea personalmente serka e grandinan na nan kas/den nan brivenbùs. A skohe pa e sistema aki pasobra e servisio di entregá pòst no ta konfiabel sufisiente.

A entregá kada tarea, na Papiamentu i na Hulandes, den un tas ku nòmber ariba, huntu ku un splikashon, indikashonnan kla i e materialnan nesesario.

A traha un grupo di Whatsapp kaminda partisipantenan i guiadónan por tene kontakto ku otro. Tambe a pidi pa saka un pòtrèt di kada tarea ku a kaba i kompartí esaki den e grupo di Whatsapp. Na momentu ku e grandinan no por hasi esaki nan so e guiadónan di Hòfi Kultural ta yuda nan ku esei.

Regalo

E partisipantenan ta kontentu ku e proyekto. “Tin biaha mi no tin gana di nada i no tin energia i e ora ei ta dushi pa hasi mi tarea”, un di e grandinan ta bisa. Un otro ta bisa: “Mi kabes ta haña sosiego ora mi bai pinta i mi no ke stòp tampoko”. Dos otro persona ta bisa ku e pòst den brivenbùs ta manera un regalo. “E ta hasi mi bida mas agradabel.”