Mas posibilidat pa trabou ku un sertifikado di horeka internashonal rekonosé. Esaki ta loke e proyekto ‘Hospitality Initiative’ ta para pe. I ku éksito! Un total di 15 partisipante a risibí nan sertifikado. Ministerio di Enseñansa, Kultura i Siensia (OCW) i tambe National Institute for Professional Advancement (NIPA) ku a inisiá e proyekto, ta kontentu ku e resultado aki.

Un logro
Drs. Peggy Dros- Richardson kual ta presidente i representante di e direktiva di NIPA ta ekspresá su entusiasmo tokante e logro aki: “Nos ta kontentu di por presensiá e impakto positivo ku e proyekto di ‘Hospitality Initiaitive’ tin riba e islanan Saba i Sint Eustatius. E logro aki ta prueba di dedikashon i trabou duru di nos partisipantenan, nos fasilitadornan i henter e tim.” 

E promé kurso certified Hospitality Instructor
E proyekto su enfoke tabata promé riba e kurso di Certified Hospitality Instructor (CHI). Eks dosentenan ku un background den horeka por a inskribí pa laga sertifiká komo instruktor. Tabatin hopi interes pa e kurso. En total 20 persona a partisipá. 15 partisipante di Saba i 5 partisipante for di Sint Eustatius. Tabata 13 siman di training ekstenso. E training a keda fasilitá dor di hefe di proyekto Anenda Zaandam. Anenda Zaandam ta un Certified Hospitality Instructor, Certified Hospitality Educator sertifiká dor di American Hotel & Lodging Educational Institute. E finalisashon eksitoso di e eksámen nivel 1 pa e kurso Certified Hospitality Instructor ta un stap importante den e proyekto ku a inisiá na mart último. Despues ku e instruktornan ta kompletamente sertifiká, e siguiente stap pa fin di e aña aki ta pa e estudio di START kuminsá. E estudio di START ta e kurso básiko den sektor di hospitalidat.  

E proyekto ‘Hospitality Initiative island’
Ku e proyekto aki OCW i NIPA kier fortalesé e posishon di merkado laboral di e trahadó den e sektor di horeka. Pa e motibu aki OCW ta finansiá e estudio kompletamente. Di e forma aki partisipantenan ta risibí un sertifikado di horeka internashonal rekonosé. Esaki ta habri porta pa mihó posibilidatnan pa trabou. Tambe esaki ta fortalesé e disponibilidat pa personal sertifiká den horeka.