KRALENDIJK- Sekshon Kultura, Arte i Literatura (SKAL) di entidat públiko Boneiru a habri posibilidat pa organisashon ku ta interesá, pa entregá nan petishon i/òf proposishon pa organisá Karnaval 2024 i aktividatnan ku tin di aber ku esaki. Resientemente organisashon Klave a duna di konosé ku nan no ta disponibel mas pa organisá aktividatnan relashoná ku karnaval na Boneiru.    

Persona-, organisashon-, òf  komishonnan ku ta interesá pa organisá Karnaval 2024  por manda nan petishon pa  SKAL. Esaki por despues ku nan a registrá esaki na departamento di Pòst i Archivo na Kaya Grandi. Por entregá e petishon pa mas tardá 30 di sèptèmber 2023. Ora nos papia di aktividatnan di Karnaval, nos ta referí na apertura di Karnaval  te ku kimamentu di Rei Momo. Pues ta trata tambe di elekshon-, festivalnan di Tumba, paradanan, Djòmp òp i Djòmp in.

Despues ku inskripshon sera, SKAL lo bai den kombersashon ku representante di tur e gruponan ku a manda petishon aden. Ora ku esaki a tuma lugá, entidat públiko Boneiru ta hasi un eskoho ta kua grupo(nan) ta haña  enkargo pa organisá Karnaval di Boneiru otro aña. Ta eksistí e posibilidat ku kuminsando ku Karnaval 2024, lo por bai traha ku mas ku un organisashon.

Mirando e embergadura di Karnaval na Boneiru, lo ta bon pa gruponan ku entregá un petishon na SKAL, presentá tambe un plan di mas aña. 

Inskripshon

Ta importante pa tene kuenta ku e periodo den kua inskripshon ta sera mirando e tempu disponibel pa preparashonnan tuma lugá.

Pa mas informashon por tuma kontakto ku SKAL na telefòn +599-715 5323 serka sra. Rina Saragoza. Despues di 30 di sèptèmber 2023 lo no atendé petishonnan ku drenta.

SKAL ta konta ku sosten i koperashon di un i tur ku ke duna nan aporte pa engrandesé Boneiru su karnaval.