KRALENDIJK—Djabièrnè 24 di novèmber a tuma lugá presentashon di buki di reseta “Dushi i salú ku berdura”. E aktividat a tabata na oula di SGB, i Sharine Loozen, a inisiá e programa di e anochi. Sharine ta Konsehero pa stimulá un bida salú na Departamento di Salubridat Públiko. 

Loozena papia riba diferente punto, kosnan ku ta na bienestar di salú di e hende. “Ántes hendenan tabata planta den kura di kas, pero esei no ta e kaso mas. Mester motivá muchanan for di na skol ku plantamentu ta importante. Tin hopi mata ku ta nase den nos naturalesa ku ta yuda nos salú. Nos no ta kome e kosnan bon i saludabel, ku por yuda bon pa nos tin un salu stabil. Ta importante ku awor a kuminsá siña e muchanan kon pa planta, pasobra tin un dicho ta bisa: sembra awe pa bo tin mayan.”

Maurice Adriaens direktor di L.V.V.,  a splika di e problema ku tin último 20 aña ku hende no ta pèrkurá bon pa nan salú. Pero tambe debí ku hende ta yega den tienda kumpra e kos, el a bira floho pa e mes planta. “Mester tene kuenta pa nos tin e konosementu di planta. Bo no sa nunka kiko por sosodé i nos mester ta prepará. Awa no mester ta un problema, loke mi ta tende hopi hende komentá. Tur hende tin awa na kas pa uzo, na skolnan tambe tin awa, pues esei no ta un kos ku ta stroba hende pa planta. Hende a lubidá di nos berdura i fruta ku tin i ta nase fásil aki na Boneiru. Mester bai bèk krea den mente di e hende, e smak pa planta di nobo.”

Hóben

Despues mener Onnie Emerenciana a duna un presentashon loke e ta hasi na skol ku e hóbennan. Ela bisa di loke e ta hasi na skolnan básiko. “No ta fásil e trabou pa siña e muchanan planta pero e ta bai den bon direkshon.” El a bin ku un mucha i el a duna un presentashon kon planta mata di tomati.

Despues a presentá e buki ku resetanan manera blachi di kalalú, kiko por kushiná kuné pa e produkto final. Tambe a papia di Pampuna i su pipita.