PARAMARIBO – Desi Bouterse mester akudí mañan, djabièrnè, na prizòn na Sürnam. Asina Ministerio Públiko (OM) na Sürnam ta skirbi den un komunikado di prensa.

Ayera a bira konosí ku OM di Sürnam a rechasá un petishon di e abogadonan di e sinku konviktonan den e proseso di e Asesinatonan di dezèmber. E tim di abogado a pidi pa para e ehekushon di e veredikto den e proseso di e Asesinatonan di dezèmber kontra e eks-presidente i kuater kompañé konvikto.

Seguidamente a rechasá mésora tambe un notifikashon di opheshon kontra e desishon ei di OM, OM ta skirbi, pa despues a solisitá e konviktonan via un ‘òrdu’ pa mèldu nan mes djabièrnè na prizòn.

Solamente Bouterse no a tuma e òrdu ei. OM ta skirbi ku e ‘partner’ di Bouterse a nenga e karta dos biaha. “Lo entregá e òrdu aki si konforme lei na dje”, OM ta skirbi.

Riba 20 di dezèmber a sentensiá Bouterse den apelashon definitivamente pa su ròl den e Asesinatonan di dezèmber na aña 1982, kaminda djessinku oponente polítiko di e régimen militar di Bouterse a muri. El a haña binti aña kastigu di prizòn.

E periodo pa solisitá grasia a vense. Djaluna tabata último dia ku por a hasi esei, pero Bouterse no a hasi uso di esei.

Presidente Santokhi a bisa anteriormente ku gobièrnu di Sürnam ta warda riba instrukshon di OM.

Nina Jurna, koresponsal di NOS pa Amérika Latino:

“No ta konosí ainda unda Bouterse mester mèldu su mes djabièrnè  pa sinta su kastigu. Mientrastantu e konvokashonnan di OM di algun di e otro militarnan penshoná sentensiá ta sirkulando si, kaminda ta indiká ku nan mester mèldu na diferente prizòn na Paramaribo djabièrnè mainta pa sinta nan kastigu.”

“Anteriormente  diferente outoridat a papia di lokalidatnan spesial kaminda Bouterse posiblemente por sinta su kastigu, teniendo kuenta ku su salú i su seguridat. A menshoná entre otro Hòspital Militar na Paramaribo i e base di marina na Boxtel.”