KRALENDIJK – Djadumingu awor 19 di mei pa 5’or di atardi tin apertura ofisial di e parke di rekreashon públiko nobo Isidel Beach Park. Ta inougurá e parke, ku ta situá entre Chogogo Resort i Den Laman Condominiums, na un manera festivo ku músika di artistanan lokal manera DJ Jewelz, Foyan Boys, Palu Grandi i Luis Moka.

For di 3’or di mèrdia públiko ta bonbiní pa bin sera konosí ku e parke i e diferente fasilidatnan. E parke ta brinda bishitantenan entre otro palapa’s, un bich grandi, un sitio di barbekiú, un restorant i tualètnan. Alrededor di 11’or di anochi ta sera e festividatnan ku un tremendo show di vürwèrk. Despues di e apertura festivo aki Isidel Beach Park lo ta permanentemente aksesibel pa tur hende.