KRALENDIJK –  Despues di a biba kuater aña na Boneiru, Nicolette Kluijver ta regresá Hulanda. E presentadó ku ta konosí pa su programanan manera “Ekspedishon Robinson i Tokante Oséano”, a muda bin e isla durante e pandemia di corona. Kluijver ta konta Bonaire.nu: “Tabata bon. Mi ke aventuranan nobo. Lo mi karga Boneiru semper den mi kurason”. 

,,Nos a bini Boneiru ora mi èks-kasá Joost tabatin un aña sabátiko i a posponé e Ekspedishon Robinson ku ami ta presentá pa motibu di corona,” segun Kluijver. “Mi tabata konosé e isla kaba di un fakansi anterior. Na prome instante nos lo a bini pa tres luna. Kada biaha nos tabata posponé nos biahe di regreso pa Hulanda. Finalmente nos a keda kuater aña akinan”. Huntu ku su èks-kasá Kluijver tabata responsabel pa un resort den e bario Republiek.

Boneiru a yuda su sanashon

Kluijver a namorá di e bunitesa di naturalesa i e hendenan kariñoso di e isla. “Boneiru tin tur loke mi ta buska: naturalesa, hendenan kariñoso i habrí i hopi trankilidat,” e ta laga sa. P’e e isla tabata un sitio maravioso pa rekuperá kompletamente despues di e diagnósis di kanser na pulmon na 2017. “Mi ta gosa ainda di sitionan bunita akinan. Pa ami Washington Slagbaai, Seru Largu i Washikemba ta e sitionan mas bunita. Pero di e último sitio ei mi no ke bisa masha”, e ta bisa harí. “Si mi konta dimas di dje, e ta kapas di bira drùk despues. Mi ta haña eina hopi bunita. Un tipo di paisahe di kòbòi. E nubianan den e besindario ei tambe ta speshal”.

Parse ku e presentadó ta gosa diariamente ainda di e bunitesa di e naturalesa e último simannan na Boneiru: “Mi por gosa di un barbulètè òf un para i pensa kon algu por ta asina kompleto. Ayera nochi mi a sinta wak un palma mei ora largu. Mi ta imaginami e ora ei ku tin un leon den e palu. Mi por disfrutá asina hopi di e pensamentunan ei. Despues di mi malesa tur esaki a hasimi asina agradesido”.

Kontribushon na komunidat 

Pero Kluijver no a disfrutá solamente di e trankilidat i e naturalesa. E presentadó semper aktivo i ku un sonrisa riba su kara tabatin deseo pa hasi algu bèk pa e isla. Asina e tabata enbolbí den diferente proyekto sosial, limpiesanan kantu di kosta i na F.K.K. Animal Rescue. “Ta asina balioso pa hasi algu bèk pa e komunidat”, e ta konta. “Mi por kòrda bon ku mi a kuminsá un akshon pa kolektá kos di hunga segunda mano serka turistanan òf famianan ku no tabata uza esakinan mas. Mi pensamentu tabata ku ta lástima ku turistanan ta kumpra produktonan akinan manera banchi pa landa, hèmber i skòp i despues ta tira nan afó atrobe. Mi a kolektá nan. Tur e koí hunganan aki tabata na mi kas. Serunan haltu. Den temporada di Pasku nos a pasa kas pa kas i a parti esakinan pa famianan ku nos a pensa ku por hasi bon uzo di un leuk regalo di Pasku. Dikon mi a hasi esaki? Mi kier a nifiká algu pa e hendenan akinan”.

Pero tambe Kluijver a organisá diferente akshon di limpiesa kantu di kosta. “Tabatin asta un akshon di limpieza kaminda 100 mucha a yuda”, e ta konta entusiasmá. “Nos tabatin músika. I ami a bisti un trahe di maskota. Ta bunita pa mira kon limpi un playa ta keda despues di un akshon asina”.

Akshonnan speshal ku hopi habitante di Boneiru ta gradesido p’e.  Kluijver tabata sosialmente enbolbí na Boneiru. Pero tambe el a siña hopi di e isla: “Di bèrdat mi no mester di nada. Pertenensianan material a bira hopi ménos importante. Mi no gusta kos karu i mi ta kore den un kachepin. Simplemente ‘back to basic’. Mi por balorá kosnan simpel hopi mas awor”.

Pia’bou na  Amsterdam Arena

Tòg a yega un fin na e aventura di Kluijver i su yunan. Na luna di yüli e ta bandoná e isla pa semper ku su famia. “Un di mi yunan ta bai skol sekundario. Esei ta un motibu pa muda. Spesialmente mi yunan lo tin ku bai kustumbrá ku Hulanda atrobe. Nan tabatin un bunita tempu akinan. Ounke nos tabata kuater aña so akinan, bon mirá nan no sa mas kon nan bida na Hulanda tabata”, e ta splika. Harí Kluijver ta agregá: “Nan lo por kore baiskel ainda? Mi no tin un idea. Ora nos ta na Hulanda mi mester bisa nan: ‘Esaki ta Amsterdam Arena. Aki bo no por kana pia’bou’. Mi muchanan a biba hopi pafó akinan. Un bunita tempu”.

Plannan pa futuro

Pa Kluijver tambe lo yega tempunan nobo. No solamente e lo bai establesé su mes ku su yunan na Aalsmeer, e presentadó ta buskando retonan nobo: “Biaha, aventura i naturalesa. Eseinan ta mi pashon. Mi ke keda traha pa International Fund for Animal Welfare na Áfrika. Huntu ku nan nos ta bai duna e olefante publisidat. Mi ta ansioso pa e bunita biahenan ku mi ta bai hasi. Pero tambe mi ta ansioso pa traha programanan nobo na RTL. Tambe mi ta hopi okupá ku mi propio liña di vestuario di terStal”, Kluijver, ku ta mira futuro positivo,  ta splika. ”Pero mi ta spera si ku mi ta hiba e trankilidat i e mentalidat ‘easy going’ ku mi a haña aki na Boneiru, huntu kumi bèk Hulanda”.

Ounke ta parse ku Kluijver ta bai sinti falta di Boneiru, Kluijver ta mira futuro ku konfiansa. “Mi ta orguyoso ku nos a hasi esaki kuater aña ku nos yunan. Lo mi karga Boneiru semper den mi kurason. Awor aki ta tempu pa sigui p’adilanti i esei tambe ta bon”.