KRALENDIJK – Resientemente, gezaghèber John Soliano a bira miembro di honor di Rotary Club Bonaire. For di aña 1983, Rotary Club Bonaire tin un tradishon pa invitá gezaghèbernan nobo pa bira miembro di honor. Kasi tur gezaghèber tabata miembro di honor. Rotary ta honrá ku gezaghèber Soliano tambe a akseptá e invitashon aki.

E instalashon komo miembro di honor a tuma lugar durante un reunion ku sena di Rotary na restaurant Macaroca. Den su palabra, presidente Jan Okhuijsen a indiká ku ta un honor pa yama bon bini na e persona notabel aki den Rotary. “Un persona ku no solamente ta un lider inspirativo, pero ku tambe, pa medio di su dedikashon i esfuerso, ta un ehèmpel di e lema ku ta uni e miembronan di Rotary: ‘Service Above Self’– sirbi otro antes ku bo mes.”

Despues di hopi palabra di apresio, ku a pone nos gezaghèber bira hasta un tiki verlegen, gezaghèber Soliano a risibí e pruéba di su membresia ku e siguiente palabranan: “Bo ta familiarisá ku e kadena di gobernador, algun kilo rond di bo nèk, pero e pin aki ta hopi mas lihé. E pin tin forma di un wiel di garoshi, i ta simbolisá forsa i inklushon.”

I pasobra e apoyo di su kasá ta hopi importante pa nos gezaghèber, su señora esposa Solange tambe a risibí un rekonosimentu speshal.

Despues di e palabra di gratitud di e miembro di honor nobo, e bon ambiente a sigi pa un bon ratu mas na Macaroca.