NIJMEGEN- E èks sekretario di estado pa asuntonan di Reino i Digitalisashon, Alexandra van Huffelen, lo tuma kargo riba 1 di febrüari 2025 komo e nobo presidente di e kolegio di maneho di Radboud Universiteit na Nijmegen. 

E nombramentu a tuma lugá pa e hunta di supervishon i a sigui despues di konsultashon ku e dekano i e konseho di partsipashon di e  universidat.

Segun Mario van Vliet, presidente di e Konseho di Supervishon, Van Huffelen ku su eksperensia di liderazgo i estilo di uni hende lo ta ekselente pa e universidat. Van Huffelen lo forma un tim di maneho huntu ku vise-presidente Agnes Muskens i rektor  magnífiko José Sanders den e kolegio di maneho.

Van Huffelen ta konsidera un honor pa kontribuí na e mision di Radboud Universiteit: “E universidat tin un ròl importante den solushon di asuntonan kompleho den komunidat. Mi ta spera pa traha huntu ku empleado, studiante i partner eksterno pa oumentá e impakto di e universidat.”

Progreso signifikante

Resientemente, Van Huffelen a wòrdu eligí tambe komo e presidente nobo di partido polítiko D66. Den su tempu komo sekretario di estado, Van Huffelen a bira popular rápidamente na e islanan, danki na su forma informal di atendá ku hende i un interes den e islanan i nan habitante. 

Huntu ku e minister pa kombatimentu di pobresa, Carola Schouten (CU), Van Huffelen a logra progreso signifikante riba vários asuntu importante pa e islanan BES.