KRALENDIJK – Ruby Pouchet, e representante di Boneiru na elekshon di Miss Universo na Mexico, ta bèk na Boneiru. Pa Pouchet Miss Universo tabata semper e meta final, un soño ku e tabata disfrutá di dje for di mucha tempu ku e tabata sigui e transmishonnan anual ku su famia. El a konta redakshon di Bonaire.nu su storia impreshonante.

Ruby Pouchet, di 29 aña, ta di orígen Venezolano, pero a nase i lanta na Boneiru. Aña pasá el a haña e bunita notisia ku e por a bai Mexico pa partisipá na e sertámen di beyesa mas grandi di mundu, e elekshon di Miss Universo.

“Miss Universo ta di bèrdat e Weganan Olímpiko den mundu di beyesa,” Pouchet ta bisa entusiasmá. “E ta un tarima ku ta eksigí muchu mas ku bunitesa so. E ta èksigí dedikashon, preparashon i un konosementu profundo di bo mes. Mi tabata dominá pa gratitut, pasobra mi tabata sa ku esaki ta un chèns úniko den mi bida. Tambe mi tabata tin hopi gana di mustra resto di mundu loke Boneiru tin pa ofresé.”

25 aña largu Boneiru no a partisipá na elekshon di Miss Universo. P’esei tabata èkstra spesial ku e tabata por a partisipá atrobe komo esun promé. “E elekshon tabata asina importante p’ami, pasobra mi gusta mustra  hende ku maske bo ta biba riba un isla chikitu, bo por soña grandi i bo por logra kosnan grandioso si bo ke esei di bèrdat.”

E komienso 

Ruby su biahe a kuminsá na aña 2022 ora ku el a partisipá na Miss Boneiru. Ounke no a haña e lisensia pa Miss Universo e tempu ei, e no a entregá. Na aña 2023 e por a partisipá na elekshon di Miss Grand na Vietnam. Un aña despues el a haña tòg loke semper el a soña kuné: un invitashon pa elekshon di Miss Universo na Mexico. “Mi tabata sa ku mi mester a gara e chèns aki, asta ora ku tabata parse difísil. Ora ku finalmente Ofisina di Turismo Boneiru a haña e lisensia i a skohé mi, mi tabata hopi emoshoná.”

Preparashon na Venezuela

E proseso di preparashon tabata intensivo. Apesar di su trabou fultaim na Entidat Públiko Boneiru, Pouchet por a biaha pa Venezuela pa dos luna largu. E pais, konosí komo un ‘powerhouse’ den mundu di beyesa, tabata e kaminda perfekto pa e trein. Mi tabata sigui lèsnan di pasarela, lesnan di aktua i mi a haña guia pa desaroyá mi propio estilo,” Pouchet ta splika. “Esaki mi a hasi ku e tim di Miss Venezuela. Tabata importante pa no sa so kon bo tin ku kana, pero tambe kon bo por tin un presensia fuerte i sigur di bo mes riba esenario.”

Komienso fuerte ku entrevistanan

Despues di trein tres siman na Venezuela, Pouchet a sali rumbo pa Merka. Aki na Houston el a laga diseñá su shimis, ku e lo a bisti durante e elekshon di Miss Universo. Un shimis ku mester tin un relashon ku Boneiru. Despues di un stòp kòrtiku, el a sali pa Mexico. Aki e elekshonnan pa Miss Universo a kuminsá. No un evento ku a organisá den un fin di siman. Tres siman largu Pouchet su enfoke tabata riba e elekshon.

Un di e lèsnan mas balioso ku Pouchet a siña einan, tabata e importansia di konosé bo mes. “Durante e entrevistanan ku e hurado durante e elekshonnan di Miss Universo bo mester tabata kapas pa trese bo vishon i ideanan dilanti den tempu kòrtiku. E punto ta ku bo mester konosé bo mes i sa kiko bo ke transmití. Ta trata di siguridat. Mi tabata hopi kontentu ku e loke mi por a trese dilanti einan durante e entrevistanan. Mas fuerte ainda, el a asta dunami e sentimentu ku na e momento ei mi lo tabata den e 30 mihó Missnan.” 

Duna diferente entrevista tabata un di e partinan kaminda Pouchet mester a distinguí su mes di e otro 128 beyesanan ku a partisipá. Tambe e mester a subi e podio grandi. Aki miles di persona tabata presente den e stadion i miles di kara tabata wak na kas e Boneriano ku tabata hasi impreshon ku su trahe kolorido. “E shimis aki tabata basá riba e refnan di Boneiru,” segun Pouchet. “Mi a laga diseñá esaki na Mexico. Tabatin diferente idea. Pero e diseño mester a reflehá algu di Boneiru. Mi a pensa por ehèmpel tambe pa laga traha algu ku un karkó. Mi a haña hopi spesial ku mi por a laga asina hopi hende mira algu di mi isla.”

Eksperensianan

Pouchet no a yega e final, kaminda e Missnan di mas bunita mester a kompetí ku otro. Un desapunto pa Pouchet ku a traha duru bai kontra e evento. E retonan físiko i emoshonal di e kompetensia na Mexico tabata pisá. Sinembargo Pouchet ta suprayá e balor di e amistatnan ku el a sera i e retnan ku el a konstruí. “E elekshon di Miss Universo ta hopi pisá. E evento mes a dura tres siman i bo ta drumi hopi tiki. No pasobra nos tabata fiesta, pero pasobra e dianan tabata kompletamente planiá ku aktividatnan ku nos mester a kumpli kuné,” segun Pouchet ku ta wak satisfecho bèk riba un di e eksperensianan mas bunita den su bida. “E loke tabata mas bunita di e eksperensia aki tabata ku mi a topa ku otro hende muhé inteligente i motivá. Nos no tabata kompartí solamente un pashon, pero tambe e deseo pa hasi un diferensia. E loke mi a eksperensiá aki tabata inolvidabel.” 

Pouchet su partisipashon na Miss Universo no ta simbolisá solamente su prestashon personal, pero tambe e orguyo di Boneiru. Manera Pouchet ta formul’é: “E biahe aki a siñami asina hopi tokante mi mes i mundu. Tabata un honor pa representá Boneiru i mi ta spera ku mi por inspirá otronan pa pèrsiguí nan soñonan, apesar di e desafionan.”