KRALENDIJK – Polisnan di bario Laurienne Francis i Irving (Lee) Anthonij wikènt tras di lomba a empeñá nan mes pa enkurashá habitantenan di nan barionan i mustra nan kompromiso. Ambos agente a organisá a tuma inisiativa i a organisá aktividatnan pa drenta den kontakto ku e komunidat i fortalesé e laso ku e barionan.

Laurienne Francis, polis di bario pa Nikiboko, Sabana, Amboina, Tanki Matrimonio, Nieuw Amsterdam, Mamparia Kutu, Bario Wanapa, Lagun Hill, Lac y Sorobon, a bishita habitantenan ku un regalitu i un karchi di Pasku. Ora di entregá, el a hasi dos pregunta importante: Kon bo ta sinti den e bario? I Kiko bo ta kere ku mester traha mas riba dje den e próksimo aña? E aserkamentu aki ta ofresé e habitantenan e oportunidat pa kompartí nan opinion i proponé ideanan pa mehorashon den nan bario.

Bo ta habitante di e barionan ku Laurienne Francis ta kubri i bo ke kompartí bo opinion òf ideanan ku Laurienne? Por tuma kontakto kuné via meil na [email protected] òf bo por pasa na warda di polis na Playa i puntra p’e.

Irving (Lee) Anthonij, polis lokal pa Nort Saliña, Hato, Bona Bista, Nawati i Republiek, a enfoká riba sostené famianan den su bario. Den kolaborashon ku Fundashon Nort Saliña a parti paketenan di kuminda pa kasnan selektá. Ku esaki, Lee a trese no solamente yudansa, pero tambe speransa pa e komunidat e luna di fiesta aki.

Habitantenan di Nort Saliña, Hato, Bona Bista, Nawati y Republiek ku ta deseá di tuma kontakto ku Lee por hasi esaki via [email protected] òf por pasa na warda di polis na Playa i puntra p’e.

Ku e inisiativanan aki, e polisnan di bario ta mustra ku nan no ta solamente supervisor, pero tambe ke hunga un ròl di konekshon den e komunidat. Huntu ku e habitantenan, nan ta spera di por sigui traha riba barionan seif i abitabel den 2025.