Esaki lo ta un edishon speshal di Pasku di sindikalismo na Boneiru pa aña 2024. Ki temporada mas bunita pa yama danki pa un aña sindikal kaminda nos a eksperenshá un kresementu formal di e konsenshi serka e trahadó i su famia en partikular, pero tambe di pueblo boneriano en general ku nos forsa ta ankrá den UNION. No un union di palabra so sino un union di akshon, di pensamentu, pero mas prinsipal un union di fiha meta komun pa alkansá. E filosofia aki, nos a pone den práktika, dunando tur nos energia, nos kapasidat i nos eksperensha pa sirbi komo ehèmpel. Fielmente i ku dedikashon nos a publiká inkluyendo e siman aki tur siman un komunikado di prensa, eksponiendo den e mihó forma i konkretamente ku echos e desaroyonan riba nos merkado laboral. Tambe nos a hasi esfuersonan pa kumpli ku vishon i meta di e klase trahadó i su famia universalmente, esta alsa e kalidat di bida ku un fundeshi sólido di su kondishonnan laboral. Tantu kondishonnan primario, esta trabou mester paga un bon salario, komo esnan sekundario ku ta tur e benefisionan banda di risibí un salario. Pero tambe nos a duna kontenido na e idea ku no ta midi kalidat di bida solamente den sèn, pero ku mes i hasta tin biaha mas importante ta e sirkustansianan bou kua mester traha. I aki nos a konsentrá pa esakinan tambe ta di kalidat haltu, garantisando seguridat na trabou, ambiente saludabel i kumplimentu ku derechonan fundamental humano, eliminando tur klase di deskriminashon i/o maltrato, abuso o eksplotashon di e trahadó dor di maluso di poder na boka di trabou. Nos a konvensé un gran kantidat di dunadó di trabou ku sindikalismo no ta un kontrinkante òf oponente di e empresario dunadó di trabou, sino un partner ku a base di rèspèt mutuo ta traha sam sam kuné pa garantisá kontinuidat di eksistensia pero tambe kresementu di e empresa ku ta e garantia pa seguridat di trabou pa e trahadó por pone pan riba mesa pa e mes i su famia.

Tur esakinan ta danki sigur tambe na e gran grupo di trahadónan ku no solamente a komprondé e kousa laboral, e nesesidat di union, sino tambe tiki o hopi huntu ku e liderato sindikal a duna di nan parti tambe pa realisá e metanan aki. Nan a ehersé durante e añanan aki e trabou pa konvensé nan kompañero(a)nan na boka di trabou pa afiliá i bira miembro. Un trabou ku nan a hasi ku balentia, surpasando menasa, intimidashon di dunadónan di trabou di mala fe i hasta atakenan di nan propio kompañeronan. Pero nan perseveransha i nan fe den e kousa a pone ku awe nan a vense tur e opostákulonan i ku sindikalismo na Boneiru a haña e Rekonosementu i e Rèspèt komo un pilar den e desaroyo sosial-ekonómiko. A logra ku awe no ta mirá sindikalismo mas komo enemigu i/o oponente di e dunadó di trabou, pero sindikalismo ta partner igual di gobièrnunan i di dunadónan di trabou i ku huntu mester karga e desaroyo sosial-ekonómiko di Boneiru. Den e kompanianan hopi di boso tin e responsabilidat di representá boso sindikato komo delegado, shòpsteward. E responsabilidat ei ta trese kuné ku boso ta e bos di trahadó na boka di trabou i komo tal boso komportashon mester ta ehemplar, pa semper e dunadó di trabou duna boso e rèspèt i rekonosementu ku boso meresé komo lidernan serio i responsabel. E aña ku nos ta bai drenta boso ta bai tin un papel importante den e sindikalismo nobo i modèrno ku mester bai hiba aki na Boneiru.

Mirando tur e méritonan aki sindikalismo na Boneiru mester konsiderá na instituí ofishalmente un rekonosimentu di apresio pa e trahadó/miembro di sindikato ku durante aña ta destaká pa promové e prinsipio fundamental di sindikalsmo ku ta union den solidaridat. Realisá ku hopi di e trabou aki te ainda ta riba un base boluntario, kaminda e trahadó ta duna su tempu liber, ta sakrifiká su bida familiar, su salú pa yuda otro. Tur esaki kompletamente grátis. Den e solidaridat aki e trahadó ta eksponé su mes na e peliger mas grandi, esta ku e dunadó di trabou ta miré komo e enemigu, e instigadó na boka di trabou i ora intimidashon, menasa no ta stroba e trahadó den búska derechonan fundamental humano di tur trahadó, e dunadó di trabou ta rekurí na su último arma ku ta kita e pan for di e boka di e trahadó. Esaki e ta usa pa manda e señal diabóliko na e otro kolega kompañeronan kiko ta warda nan si nan bira miembro di un sindikato. I den e aña ku a transkurí esaki a tuma lugá, kaminda a usa kontratonan di tempu definí pa no alargá esakinan komo represaya pa stroba sindikato pa organisá trahadónan. I serka un empresa esaki a sosodé públikamente. E trahadó ei pa nos ta i lo keda e heroe di aña 2024 pa bin na remarke pa risibí públikamente su premio di mérito 2024. I nos sigur lo no lubidá esaki. Si na 1795 a kita bida di esun(nan) ku a sali dilanti den e lucha sagrado aki, awe na 2024 ta usano kita pan for di boka di tata i mama di famia pa stroba e lucha hustu. Pero sa ku semper hustisia lo vense inhustisia.

Ku esaki tambe mi ta deseá pueblo di Boneiru en general i e klase trahadó i su famia FELIS DIANAN DI PASKU  i laga e dianan aki sirbi tambe komo tempu di reflekshon pa kada un di nos hasi e propósito pa den aña 2025 ban fortifiká e UNION sindikal ku solidarismo pa asina nos hasi e bos di e trahadó mas fuerte i asina logra nos Rèspèt Rekonosimentu i Rekompensa ku nos meresé komo ser humano.