KRALENDIJK – Mientras dianan di fiesta ta aserkando i mundu ta kubrí di e espíritu di pasku, komunidat na Boneiru ta fiha su atenshon riba un inisiativa spesial ku a toka kurason di hopi hende: Banko di kuminda na Boneiru. Bou di guia di Maarten Caljouw e organisashon ke hasi hopi hende kontentu e aña benidero apesar di diferente reto. Redakshon di Bonaire.nu a hasi e organisashon, ku tabata sentro di atenshon e último simannan mediante diferente inisiativa riba e isla, un bishita.

“Nos tin e suèrtè ku nos ta haña asina hopi sosten, sigur den e temporada di aña aki,” Caljouw ta bisa. “Pero ta e tempu tambe kaminda ta rekòrdá nos riba e tantísimo personanan ku nos no a logra yega serka nan.” Banko di kuminda na Boneiru ta yuda tur siman no ménos ku 325 hende soltero i famianan na Boneiru. Asina por ehèmpel mamanan soltero ku ta pasa trabou pa nan sèn yega por tin derecho riba bruki i lechi pa beibi. Tambe tin famianan mas grandi ku tin problema pa pone pan riba mesa a konsekuensia di e preisnan ku ta subi na Boneiru. Banko di kuminda ta sostené nan tur.

Un ola di sosten

Banko di kuminda a risibí último tempu sosten konsiderabel for di diferente skina di komunidat. Un punto kulminante spesial tabata e akshon di rekoudá fondo di e èks-dj di radio Wietze de Jager, ku a sa di rekoudá no ménos ku 127.382 euro.  “Ta konmovedó pa mira kon hendenan ta bini huntu pa yuda,” Caljouw ta konta. “Ku e sèn aki nos por sigui parti paketenan di kuminda pa hendenan ku mester di esaki.”

Un otro kontribushon importante a bini tambe di un grupo di crossfitters ku a trein 24 ora largu sin stóp pa rekoudá sèn pa banko di kuminda. Finalmente nan esfuersonan a produsí 3.800 dòler. “Ta inspirativo pa mira kon personanan ta uza nan pashon pa e bon kousa,” Caljouw ta bisa. “E ta demostrá ku kada ken na su manera por kontribuí na un mundu mihó.”

E personanan tras di banko di kuminda

Mientras e sosten finansiero i donashonnan ta importante, Caljouw ta pone énfasis riba e impakto bèrdadero di banko di kuminda: e hendenan ku ta risibí yudansa. “Kada ken ku bati na nos porta, tin su propio storia,” e ta splika. “Tin persona ku temporalmente ta for di balansa pa motibu di un akontesimentu inesperá, otronan tin mas tempu den un situashon difísil, nos ke t’ei pa tur e hendenan aki.”

Un di e storianan ku Caljouw ta kompartí ta di un mama soltera ku tres yu. “El a bini serka nos ku awa na wowo, simplemente pasobra e no tabata sa kon pa duna su yunan kuminda,” Caljouw ta kòrda. “Danki na banko di kuminda e tin awor un tiki espasio i por traha na un futuro mihó pa su famia.”

E nesesidat ta keda grandi

Apesar di e éksitonan i e storianan positivo e nesesidat ta keda grandi. “Tin ainda hopi hende ku nos no por alkansá,” Caljouw ta atvertí. “E demanda pa nos servisionan ta krese, spesialmente awor ku kosto di bida ta subiendo. Nos mester di mas sosten pa por yuda tur persona ku mester di dje.”

“Nos a ripará ku e aña aki a hasi ménos donashon di kuminda. Mi ta komprondé esei si. Pa otro hende tambe e preisnan den supermerkado ta subi,” segun Caljouw ku ta keda pidi yudansa na komunidat despues di dianan di fiesta. “Ta tremendo ku nos ta haña asina hopi sosten durante temporada di Pasku, pero e nesesidat no ta stòp despues di dezèmber. Nos mester di donashon- i bolutarionan henter aña. Banda di esei nos ta spera ku personanan ta laga algu atras den e bakinan banda di e kahanan di Warehouse i van den Tweel. Kiko por yuda nos? Kuminda den bleki, pasta, djus, lechi, puiru pa beibi, bruki, pero tambe artíkulonan di limpiesa, fèrbant femenino, skeiru di djente òf produktonan pa laba paña.”

Problemátika

Ta bunita ku 325 soltero i famia na Boneiru por hasi uzo di e oferta di pakete di kuminda. Sinembargo e sifra aki segun Caljouw ta hopi abou. “Si e banko di kaminda tabatin e kapasidat i mas medionan finansiero, asta 800 famia lo a bati porta serka nos. Lástimamente nos no por yuda tur hende ainda,” segun Caljouw ku ta mira mas hende buska ayudo pa motibu di e gastunan kresiente riba e isla. E demanda grandi segun e no ta debí solamente na e gastunan kresiente. “Suèldu mínimo i kompensashon pa yu ta subi. Esei ta bon pa hopi hende. Sinembargo mi ta mira hopi hende ku tin problema ku traha presupuesto. Tin hopi hende ku tin debe riba e isla aki. Esaki ta konsekuensia tambe di e fasilidat ku hendenan por fia na diferente tipo di kompania. Pero ku no tin e posibilidat pa paga esaki bèk. Esaki ta un problema na Boneiru.”

Yamada pa akshon

Caljouw ta finalisá ku un yamada pa akshon: “Nos mester di sosten di tur hende. No solamente finansiero, pero tambe den forma di tempu i ekspertisio. Huntu nos por pèrkurá ku niun hende na Boneiru mester muri di hamber.”

E espíritu di pasku ta fuerte na Boneiru, i ku sosten di komunidat e banko di kuminda por sigui krese i floresé. Pero manera Caljouw ta enfatisá, e trabou ta leu for di kla.