KRALENDIJK – Boneiru ta kla pa benta di vürwerk, ku ofisialmente tin mag di kuminsá bende djabièrnè. Pa e benta di vürwerk i tiramentu di esaki,  Entidat Públiko Boneiru (EPB) manera ta kustumber ta duna un eksonarashon di e prohibishon normal durante otro dianan di aña.

A pesar di rumornan persistente ku e konteinernan di klapchi i otro vürwerk lo no a yega Boneiru na tempu, por ripará ku ta parse di tin asta mas punto di benta, na  lugá di ménos ku ta bendiendo vürwerk. 

Tambe den komparashon ku aña pasá, por mira ménos bendedó chikitu i mas bendedónan grandi. E mayoria di bendedó ta bendiendo awor aki for konteiner di 40 pia transformá den un punto di benta. Tin di e puntonan aki ku a prepará un lugar di parker temporal i asta ku bòrchi pa guia tráfiko. 

Riba djaweps por a mira aktividat na diferente puntu di benta, kaminda tabata kargando e vürwerk pa por kuminsá bende for di awe, djabièrnè. 

Koutela

EPB mientrastantu a hasi un yamada na siudadano pa tene kuenta ku e bestianan na e isla ora tira vürwerk. Asina, e EPB ta rekomendá pa kumpra i sende vürwerk ku ta saka strea I lus, i mènos ku sonido duru. Tambe EPB a hasi yamada pa reportá bestianan ku a spanta  òf a wòrdu heridá na instansianan ku ta protehá bestia riba e isla.