KRALENDIJK- Djasabra a kuminsá traha riba kaminda Governador Debrot, pa solushoná e problemátika di laman ku ta subi tera na altura di Harbor Village Marina.

Gobièrnu a komuniká ku lo sera e kaminda pa masomenos dos siman di tempu, pa kaba di drecha e kaminda ku a detoriá hopi durante último añanan.

Tráfiko pa awor lo wòrdu desviá pa e kaminda di tera ku a konstruí pa parti mas pegá ku Saliña di Vlijt. Lo ta di wak si e solushon ku ta bai traha riba dje awor aki lo ta uno duradero i sostenibel. Den pasado a ehekutá diferente estudio pa solushoná e problema aki, pero tin vários aspekto ku ta hasi esaki difisil.

Brùg

Entre otro a bin ku plan pa traha un brùg na e sitio, pero esaki tin komo debentaha ku ora di yobida, tera fertil lo por basha bai den laman i e tera por ta dañiño tambe pa ref serka di kosta.