ORANJESTAD- E isla di St. Eustatius riba djamars a selebra nan dia di Bandera na grandi. E selebrashonnan a tuma lugá hinter dia, pero en realidat semper tin aktividat i selebrashon promé i después di 16 di novèmber, ku ta e fecha ofisial.

Komisario di Gobièrnu, Alida Francis, durante su spich na e parti ofisial a para ketu na e diferente logronan di e island den añanan i lunanan tras di lomba. Asina a logra renová i konstruí diferente kaminda, a traha un edifisio nobo pa aeropuerto i a konstruí un kompleho pa hende ku tin mester di sosten social. 

Según Francis, tin mas kos bon na kaminda. E komisario a referí na e servicio di fèri nobo entre e islanan ta serka di kuminsá, i tambe konstrukshon di un bulevar dilanti aeropuerto. 

Demokrasia

Un proyekto importante ta e restorashon di demokrasia kompleto riba e isla. Aunke aña pasá a tene elekshon i a instalá un Konseho Insular, esaki práktikamente no tin ningún outoridat ainda. Asina Konseho Insular no por nombra un Kolegio Ehekutivo, i moshonnan ku ta pasa mas bien tin un nifikashon simbóliko. Tur desishon ainda ta wòrdu tumá dor di e dos komisarionan ku Hulanda a nombra, ku actualmente ta Alida Francis i Claudia Toet.