KRALENDIJK- Kuater Rangers di Stinapa riba djasabra a logra terminá nan kurso di Open Water Diving, danki na un programa patrosiná pa e kompania VIP Diving. 

E kurso a tuma vários siman di lèsnan teorétiko, kombiná ku lèsnan práktiko den laman. Djasabra Ian, Micki i Robin i Ramso a terminá e kurso. 

E kurso a wòrdu duná dor di e instruktora Aja Radl, ku a mustra su mes hopi orguyoso di e kuater studianteman. “Na a ègt hasi nan bèst i nan tabata hopi organisá. Na final di e kurso nan a hiba ami sambuyá i nan a prepara e sambuyamentu te den detalle. Mi no ta duda ku nan tur lo ta sambuyadó ekselente”, asina Radl a bisa.

VIP Diving

E kompania VIP Diving ya pa años ta aportando dunando kurso gratis di sambuyamentu na hóbennan lokal. E kompania ta sòru pa un instruktor, i Stinapa ta sòru pa material i pago di e sertifikado. 

VIP Diving ta haña importante pa siña hóben lokal tambe sambuyá i bira profeshonal den sambuyamentu. Nan no ta duna solamente kursonan básiko gratis na e hóbennan aki, pero asta riba nivel mas avansá. E programa pa años tabata na enkargo di Kevin O’Brian, ku den último añanan a kuminsá haña aporte di otro boluntario.