PARAMARIBO – Na Sürnam a start un di dos investigashon di 3.2 mion florin ku a disparsé for di kuenta di ministerio di Finansas. De Ware Tijd a skirbi siman pasá ku Ministerio Publiko di Sürnam despues di un investigashon a laga pone embargo riba kuentanan kaminda a depositá e sèn.

President Chan Santokhi a ordená un investigashon interno. Tambe e kaso ta den skochi di Ministerio Públiko, Santokhi a bisa djadumingu den diferente entrevista.

Segun de Ware Tijd dos sospechoso a hui bai eksterior. Den e investigashon lo a bini dilanti tambe ku dos kolabordó di Finansas ta enbolbí den e froude.

Pa medio di instrukshon di pago falsu kolaboradónan di ministerio di Finansas lo a pasa sèn di kuenta di estado di Sürnam pa kuentanan na un banko lokal.

Di dos skandal

Ta di dos skandal den tempu korto ku Sürnam ta hañ’é enbolbi den dje. Na febrüari a kondená e anterior presidente di Banko Sentral di Sünam na un kastigu di prisòn di 8 aña pa labamentu di plaka, malversashon di fondo  i korupshon.

Anterior minister Hoefdraad di Finansas tambe tabata sospechoso den e kaso. Apesar di un prohibishon pa biaha el a sabi di sali for di pais. A konden’é pa motibu di ousensia na un kastigu di prison di 12 aña.