KRALENDIJK- Djaweps atardi a tuma lugá e apertura ofisial di e di dos Anual Bonaire International Sports Week. Pa duna inisio ofisial na e seremonia di apertura, esaki a kuminsá ku palabranan di bonbiní di Terrence de Jong hefe di INDEBON.

Promé ku de Jongh a pasa pa e apertura a pidi pa tene un minüt di silensio pa rekordá Franklin Chrestian ku a bai sosegá i ku a hasi masha hopi mes pa deporte na Boneiru. 

“Awe nos ta pará na di dos edishon di e siman di deporte. Aña pasá masha komentario tabatin rondó di e aktividat. E aña aki tambe tin 10 rango di deporte. Ta partisipá Aruba, Kòrsou i otronan. Nos tur ta huntu awe pa nos sostené otro pa e evento grandi aki. Sin gobièrnu di Boneiru, TCB, Fundashon Wega di Number Boneiru, E kompetensia di deporte aki no por tabata un realidat.  Ta trata di un evento hopi grandi. E parteners nan a uni pa organisá esaki. Mayan e weganan ta kuminsá i tin diferente wega. Futsal, beach tènis, beach vòli, sòftbòl otro siman ta bai tin kompetensia di landamentu ku ta hopi popular, e swiming pool natural”, asina De Jongh a trese dilanti. 

“Mi ta haña bunita pa mira pa tiki ku INDEBON tin kon nan ta desaroyá. Ayera un ekipo di Boneiru a empatá ku El Salvador. Usa e momentu aki pa e talento i e bunitesa di nos isla. Di e manera aki nos ta invitá tur otronan, pa bin disfrutá di nos dushi Boneiru. Danki na boso tur pa loke boso ta hasi pa logra e sport week aki posibel. Ban sigui ku e desaroyonan aki i krea mas pa futuro”, asina diputado Clark Abraham a bisa. 

Anne Marie Mercera, direktor Fundashon Wega di Number Boneiru (FWNB), a pone énfasis riba e invershonnan ku FWNB a bin ta hasi de deporte na Boneiru.  E mihó manera pa hende move, ta hasiendo deporte” Mercera a bisa kende a hasi un apleashon tambe riba mayornan di yu ku no ta hasi deporte ainda, pa pasa ku nan yu na diferente wega pa motivá nan pa tambe hasi deporte. 

TCB

Representante di Tourism Corporation Bonaire (TCB) Marjolein Oleana a bisa ku TCB ta orguyoso di tuma parti  den e 

“Nos ta orguyoso pa tuma parti na e siman di deporte ku ta bai tuma lugá. Hopi deportista lokal a pone Boneiru riba mapa. Nos por menshoná Taty i Tonki entre otro ku a destaká den e deporte di windsurf. Danki pa tur esnan ku a kontribuí. Sigui destaká den rango nan di deporte, no solamente lokal, pero tambe internashonal. Hopi éksito pa un i tur e rangonan di deporte ku ta bini.”

Despues a tuma lugá kòrtamentu di sinta, ku kual a deklará e di 2 anual Bonaire International Sports Week 2024 habrí.