KRALENDIJK- Djabièrne mainta na sede di ABVO a tuma lugá firmamentu di e promé CAO pa empleadonan di Pensioenfonds Caribisch Nederland (PCN).

Na e okashon a hiba palabra president di AFBW, Cherrel Kwidama, presidente di PCN Harald Linkels, i konsehero di AFBW, Norwin (Nòchi) Willem. Kwidama di su banda a felisitá e empleadonan ku nan CAO nobo i a deskribí esaki komo históriko. “Mi ta bisa ku ta trata di un echo históriko, pasombra ta trata di promé instituto finansiero na nos isla, kaminda e empleadonan tin un CAO”, asina Kwidama a bisa.

Harald Linkels tambe a felisitá e empleadonan ku e logro, pero alabes tambe tabata tin palabra di elogio pa AFBW i e shopstewardnan di parti di PCN, Maraguanela (Nela) Martis i Angelo Engelhart. “E negosashonnan a kana den un ambiente hopi bon, i sèmper respetuoso, ámbos di parti di AFBW i di parti di e shopstewardnan”.

Linkels a bisa tambe ku e ta orguyoso di e tim di empleado di PCN i ku PCN su meta ta pa ta un di e mihó dunadó di trabou na Boneiru òf esun mihó mes. “Semper PCN tabata tin bon kondishon di trabou kaba, pero nan a bira ainda mas mihó ku firmamentu di e CAO aki”.

Felisitashon

Nòchi Willem di su banda tambe a ekspresá palabranan di felisitashon i a yama PCN, e shopstewardnan i notulista Frederique van den Steen danki pa e bon trabou, di forma ku por a kaba di konkretisá i firma e CAO promé ku dianan di fiesta.

E CAO ta drenta ofisialmente na vigor dia promé di yanüari 2024.