KRALENDIJK – Djaluna atardi 23 di dezèmber, polis a detené un hende hòmber di 59 aña di edat na un luga di komèrsio na Kaya Avelino Cecilia, durante un akshon di listramentu preventivo.

Durante e kòntròl, a haña diferente tipo di droga i un kantidat konsiderabel di sèn kèsh. E sospechoso ta sospechá di a violá e Leinan di Opio BES. E detenshon ademas a resultá den un entrada den un kas na e bario di Nikiboko. Duranti e rebuska, polis a konfiská diferente produkto ku ta importante pa e investigashon ku ta bai kuminsá.

Djabièrnè atardi dia 27 di desèmber, polis a hasi un otro akshon di listramentu preventivo. Durante e kòntròl na siete lugánan di komèrsio i un grupo di hóben bou di un palu, polis a konfiská diferente produkto inkluyendo droga, atributonan ku ta indiká benta di droga, un machete i dos kuchú.

Durante e akshonnan aki, hende den zonanan di riesgo di seguridat por wòrdu listrá sin tin nesesidat di un sospecho spesífiko. E zonanan di riesgo di seguridat ta inkluí parti di Playa, Antriol Pabou, Antriol Pariba, Nikiboko, Nort Saliña i Tera Kòrá.

Ayudo di komunidat

Polis ta enfatisá importansia di kolaborashon ku komunidat. Kalke suidadano ku tin informashon tokante situashonnan suspechoso òf ke duna un tep por tuma kontakto via number di telefon 715 8000 òf anónimamente via e tipline 9310.