KRALENDIJK – Durante un enkuentro djarason atardi, a selebrá e hecho ku Gobèrnu Lokal, ku ayudo di gobèrnu Hulanda na Den Haag, a logra kumprá e anterior plantashon Fontein. 

E meta di e compra, ku na tur a kosta 3,4 mion di dòler, ta pa preservá e área i mantene dje aksèsibel pa poblashon. Awor e ta den man di gobèrnu i e meta ta pa komunidat por hasi uso di dje, manera tabata e kaso den pasado. Gobièrnu Hulandes a aportá ku 2,4 mion, mientras ku Boneiru mes a aportá ku 1 mion di dòler. 

Bastante hende a reuní na Fontein ayera pa tuma un vistazo di promé man na e área. A pesar di su estado aktual di deskuido, e área ta sigui atrai bishitante.  

Ministra Christianne van der Wal Zeggelink tabata presente i a ekspresá su deseo ku e lokashon keda den poseshon di gobèrnu i lo preservá su struktura aktual. 

Komisario Hennyson Thielman a enfatisá e balor históriko di Fontein i su riku historia, for di presensia indígena te na striknan di trabou i pikniknan di tempunan pasá. El a referí na dje komo un sitio di hopi rekuerdo. 

Adkisishon

Komisario Jolinda Craane a duna un repaso di e proseso ku a kondusí na rekuperashon di Fontein i a subrayá e deseo pa desaroy’é di un manera strukturá i auténtiko, preservando su karakter. Tambe a entrega un rekonosimentu na Buchi Frans pa su dedikashon na e sitio, ku el ta sigui mantene.