KRALENDIJK- Riba djamars e sindikato A.F.B.W, ku resien a gana e referendùm na e kompania di gobièrnu Selibon N.V.  a firma ku gerensia di e kompania, pa kuminsá e proseso pa negoshá un CAO nobo.

Esaki a sosodé den presensia algun empleado di SELIBON N.V., e direktor di e kompania i  Cherrel Kwidama, presidente di A.F.B.W. Promé ku e firmamentu a tuma lugá, Rudsel Leitu a bisa ku awor despues di hopi turbulensia entre trahadónan i  SELIBON N.V, awor ta momentu di pas i positivamente kana pa dilanti pa mihó.

“E trahadónan tin derecho riba bon atenshon i loke mester drecha sigur nos ta bai duna atenshon. Nos lo hasi tur esfuerso pa nan tin un bon CAO, loke ta na bienestar di trahadó i nos. E kòmbersashonnan ku sindikato A.F.B.W. ya ta den bon harmonia,” Rudsel Leitu a bisa.    

Rápido

Kwidama na su turno a bisa e proseso a kana rápido den bon harmonia nan ku SELIBON N.V. i awor ta bai atendé tur kos pa ámbos partido ta satisfecho ku e CAO nobo. “Sigur tin un bon harmonia entre nos i SELIBO N.V. i awor pa dilanti kombersashon i deliberashon ta kuminsá pa renobá e CAO aktual na bienestar di e trahadó ku sigur meresé”, asina Kwidama a bisa.