KRALENDIJK – E sindikato AFBW ta mira bek riba un aña finansiero 2021 stabil. Konforme AFBW su statuto tur aña mester tin un relato finansiero i esaki tin ku wòrdu publiká na su miembronan.

E direktiva aktual ta kumpliendo ku esaki konforme su statuto. AFBW a logra diferente adelanto pa e klase trahadó i su miembronan. AFBW ta bon representá i ta partisipá frekuentemente den e Union Sindikal Boneriano, USIBO. AFBW konhuntamente den USIBO a logra traha na bienestar di e pueblo riba nivel makro, den Diálogo Sentral.

AFBW ta sigui traha na bienestar di su miembronan, segun tesorero di AFBW; AFBW ta di miembronan i pa miembronan, sin miembro no tin AFBW. Direktiva ta kere den union i transparensia, un maneho finansiero transparente.

AFBW ta hasi uzo di servisionan di diferente profeshonal nan, entre otro tenedó di buki, akountent, hurista nan, abogado nan i konseheronan riba e área sindikal.
Mirando ku novèmber binidero ta hasi tres aña ku e direktiva aki a haña e mandato pa reorganisá AFBW i por bisa ku firmesa a logra esaki tambe i awor e momentu ta yegando pa por kumpli ku su statuto i organisá un kongreso i organisá un elekshon kaminda e miembro lo tin ku vota pa un direktiva nobo pa aña 2022 – 2025.

AFBW ta pidi tur su miembronan i miembronan ku ta aspirá pa bira miembro pa keda pendiente pa den luna di Ougùstùs, pa tur e informashon nan pa ku e proseso elektoral 2022 – 2025.
Direktiva ta gradisíbu di ta un miembro di AFBW i ta pidibu pa ban sigui den union fuerte pa por sigui hiba e lucha sosial i pa hustisia laboral.