Miembronan di Konseho Insular i Kolegio Ehekutivo ta na Hulanda pa deliberá, kombersá sera konosí ku diferente instansia. Kiko ta e  puntonan ku ta di importansia pa Bonaire no ta divulgá. Si no a bisa kiko ta bai hasi na Hulanda,  mi pregunta na tur medio di komunikashon ta dikon ke puntra sí ora tur ta bèk na Bonaire, resultado di e mishon pa Hulanda.

Un bòikòt ta na su lugá. Pero esaki lamentablemente lo no sosodé. Ki interes ami tin si a papia ku Raad van State, a sera konosí ku miembronan nobo di parlamentu hulandes òf papia ku organisashonnan pa yuda Bonaire. A bai mendigá na Hulanda.

Ta pidi yudansa pa motibu ku tin un malesa i mester di ayudo. Hulanda ta bai hari, saka pòrtrèt, kombersá ameno i duna bo un karisia. Aki ta trata di  “knuffelrasisme” Karisia ku toke di rasismo. San Pedro a sunchi Hesus”, Gijs de Vries di PvDA a sunchi defuntu Miguel Pourier. Bo supuesto amigu ta traishoná bo.

Tin pregunta mas interesante pa kontestá. Kua miembro di Konseho Insular a pidi i riba òrdu di ken a sera sitionan di stashoná outo na Passangrahan.? Ki ta resultado te na e momentunan aki di e Akuerdo Atministrativo? Tin un evaluashon di e mènedjer di programa? E ta keda te ku 2022?

Ta para otorgamentu di tereno i laga siudadano warda hopi aña riba un desishon òf pèrmit. Esaki ta kuadra ku prinsipio di bon gobernashon? Den tempu di elekshon polítikonan lo brasa bo, sunchi bo, hari ku bo i primintí bo un kaska di pinda. Nan ta nada ménos ku Karisia ku toke di rasismo.. Votadónan sigui adorá bo mes hendenan ku ta menospresiá bo.