ORANJESTAD- Miembro di Konseho Insular independiente na St. Eustatius, Koos Sneek, ta bai lanta un partido lokal, afiliá na Christen Democratisch Appèl (CDA).

Segun Sneek, CDA na Hulanda a kaba di duna aprobashon pa e inisiativa. Sneek ta mira hopi bentaha den e plan di un partido lokal afiliá na CDA. “Ku esaki hopi informashon i fasilidat ta bira aksesibel pa nos komo partido lokal, pero tambe pa loke ta trata di formashon di lidernan polítiko”, asina Sneek a trese dilanti.

E afiliashon di Sneek ku CDA no ta nobo den sentido ku Sneek den pasado ya a kampañá pa CDA, meskos ku UPB i James Kroon a hasi na Boneiru.

Miembro i lider

E partido nobo tin awor aki solamente 10 miembro, pero segun Sneek ta e inteshon pa esaki krese rápidamente. Tambe Sneek a bisa ku e lo ke mira su asistente di frakshon te awor aki. Sjahairah Fleming bira e lider di e partido nobo. Esaki, segun Sneek, lo mester wòrdu ratifiká ainda dor di un reunion general di miembresia di e partido nobo.

Mayoria di e reakshonnan na St. Eustatius tabata negativo riba e anunsio di Sneek. “E baratio pa bende Statia ku Hulanda a kuminsá”, asina un habitante a skibi riba medionan sosial. Otro a skibi ku e, personalmente, lo no laga asina sosodí ni maske mester traha huntu ku su enemigo polítiko di mas grandi.

Aktualmente e konseho insular di Statia tin 3 partido: PLP ku 3 asiento, Partido Demokrat di Statia 1 asiento i frakshon Sneek tambe ku 1 asiento.