Daisy Coffie a bishitá Plenchi di trabou

Kralendijk- Djárason 27 di Òktober último miembro di Konseho Insular Daisy Coffie, a bishitá plenchi di trabou despues di a haña un invitashon pa esaki. Daisy Coffie tabatin krítika riba Plenchi di Trabou dor di reklamo­nan ku e tabata risibí di parti di klientenan ku a bai Plenchi di Trabou pa un intermediashon den buskamentu di trabou.

Coffie a kuminsá ku gradisí pa e invitashon i a ekspresá ku e ta kontentu ku e inisiativa di parti di Plenchi di Trabou pa invit’é i tambe ku ta promé biaha ku e inisiativa ta sali for di e organisashon pa un bishita di trabou. Den otro kasonan sèmper ta Frakshon Coffie a tuma e inisiativa.

Frakshon Coffie a keda risibí pa Susanne Willems ku te esun enkargá ku e büró i Yajaira Nicolaas ku ta su asistente. Nan dos ta forma e gerente di e büró. Coffie a haña splikashon di e trabounan ku Plenchi di trabou ta hasi i e diferente proyektonan ku Plenchi di Trabou ta envolví aden. Frakshon Coffie a keda gratamente sorprendí ku e tantísimo trabounan i proyektonan ku Plenchi di Trabou ta enkargá kuné.

Bottlenecks

Tambe a kombersá riba e “bottlenecks” ku ta menasa nos merkado laboral. E nesesidat di entrenamentu pa trabounan di fishi (ambachtschool, huishoudsschool i etao) manera ántes pero den un bachi nobo i aktualisá na nos tempu. Na nivel HBO, MBO tin basta bon trabou ta tuma lugá, pero na e nivelnan mas abou nos no ta prepará nos hóbennan sufisiente komo konsekuensia ku na no ta kapas pa utilisá mihó oportunidatnan ku ta presentá.

Tambe ta bon pa remarká ku e sifra di desempleo, 4.6% aktualmente, ta un nivel basta akseptabel. Tin proyektonan di entrenamentu/preparashon pa drenta e sektor laboral pero mester bini ku mihó kordinashon pa ora e proyekto kaba e  partisipante tin mas chèns pa haña un trabou di tempu mas largu i no kai bek den e sirkulo di desem­pleo. Un konklushon ta ku fishi, motivashon i ambishon ta puntonan ku mester traha riba pa nos hóbennan ta mihó prepará pa e merkado laboral.

Nivel

Frakshon Coffie a keda impreshoná tambe ku e ofisina di Plenchi pa Trabou riba su es. “Esaki mester ta un ofisina modelo pa ofisinanan di OLB. Esaki ta e úniko ofisina ku nos a bishita ku kua vestuario/mobilario por kompetí ku ofisinanan di RCN”, asina Coffie a trese dilanti despues di su bishitá.