KRALENDIJK- E kolegio Ehekutivo anterior, sostené pa UPB i MPB no a sòru pa finansiamentu pa por realisá i operá un dragstrip. 

Esaki diputado di finansas, Clark Abraham a bisa djabièrnè durante e rueda di prensa semanal riba preguntanan di prensa, dikon nada no ta sosodiendo na e fasilidat. 

Abraham, kontestando e pregunta, tabata basta skèrpi i krítiko. “Echo ta ku gobièrnu anterior no a sòru pa ningun plan, ni no a prespuestá sèn pa por operá e fasilidat aki”. E diputado a bisa ku e ta papiando a base di echo, i a reta ken ku sea, pa bin mustra na unda den presupuesto di Entidat Públiko a reservá sèn pa esaki. 

Abraham a sigui bisa tambe ku e plan a keda manera na mitar. “A primintí un dragstrip, ku al final di dia a bira un pista di dreft. Esaki no ta mesun kos. A bisa ku a hasi 400.000 mil dòler liber pa traha esaki. Pero pa 400.000 dòler bo no por traha hinter un dragstrip, ku ta un pista basta largu”. 

E diputado a sigui splika ku realmente hefe di Indebon a konfirmá tambe ku no tin un plan trahá pa atendé ku e fasilidat, ni tampoko a hinka aglu den presupuesto ni di aña 2024, ni di aña 2025.

Elekshon

Diputado Abraham a bisa tambe ku no por mira e pista di dreft lòs for di elekshon ku a tuma lugá aña pasá. “Ta hopi remarkabel ku nèt promé ku elekshon a kuminsá ku realisashon di e proyekto aki, i hende a bai tras di loke diputado di e tempu ei a bisa”. 

Abraham a bisa tambe ku mester stòp di bai tras di loke ela deskribí komo ‘palabranan bashí’ di sierto polítiko i asta mandatario. “Si un hende bin bisa bo ku a reservá sèn pa algu, puntrele na unda den prespuesto esaki ta skibí”. Segun Abraham, si no por bin ku e prueba, ta nifiká ku realmente esaki no ta eksistí i no a reservá e finansiamentu nesesario.