KRALENDIJK- Diputado James Kroon di infrastruktura tin eksaktamente tres dia mas pa kumpli ku un promesa ku ela hasi den Konseho Insular, pa loke ta trata e asina yamá rotonde-gate.

Den un reunion di Konseho Insular, Diputado Kroon ku man riba su kurason a primintí ku e resultadonan di e investigashon na kiko eksaktamente a pasa ku e rotònde frakasá na Kaya Amsterdam lo keda publiká pa mas tardá dia 15 di yüni.

Asumiendo ku Diputado a referí na 15 di yüni 2022, i ningun otro aña, esaki ta nifiká ku e Diputado tin eksaktamente 3 dia mas pa publiká e rapòrt a base di un asina yamá ‘estudio atministrativo’.

Gezaghèber

Gezaghebber Edison Rijna ta di opinion ku no por tilda e di nada den e kaso di e investigashon i e tardansa pa publiká resultado. “A hinka e investigashon aki den man di un partido eksterno”, asina Rijna a splika despues di preguntanan krítiko ámbos den Konseho Insular i pa medionan di prensa na Boneiru.