KRALENDIJK–Trinta di aprel 2024, selebrashon Dia di Rincon, edishon 35, ta bai bira e fiesta di mas grandi ku Rincon a konosé.  Esaki ta loke e miembronan di e tim ku ta preparando pa e aktividat a bisa prensa.

Diana Kroon-Janga, miembro di komishon Herensia Kultural Rincon e promé ku a papia djaweps atardi tokante preparashon pa dia di Rincon binidero.

“Pa nos ta un plaser pa komuniká ku tur hende e aktividat grandi ku ta na kaminda. Ya nos tin un temporada trahando riba e selebrashon aki. For di trempan hendenan ta puntra pa dia di Rincon.

Nos tin un kalendario meresí pa Dia di Rincon 35 aña. Henter luna di aprel, ta luna di kultura. Kantidat di aktividat ta bai tin kanto krioyo, Den Trin i aktividatnan nobo. Poulatinamente ta bai publiká aktividatnan. 30 di mart ta sende e mecha di lantèrna ku ta paga dia 1 di mei. Nos Rinconeronan, ban sali i engrandesé e fiesta aki tur ku tin. Hóbennan i adulto, ban duna Cendion un man pa e presentá e proyekto ku e tin plania. Danki na tur hende, ku di un òf otro forma, ta yuda nos.”

Programa nobo

“Algu grandi ta bai sosodé un programa nobo. E simadan di antaño, tei nos ta bai krea algu pa teater den aire liber.

Tur hende ban yuda ku esaki pa esnan ku ta bini for di eksterior,  por mira. Esaki ta algu úniko, e parada di antaño ku ta bira un teater na aire liber. Tur hende ku ke partisipá, aserká mi pa nos yega alrededor di 100 hende. Info@Dia di Rincon.org. Tur hende por partisipá”, asina Sedion Balentin a splika.