Aña pasá e miembronan di Kanta Orkidia, e kor di Rincon, a pasa na porta di e habitantenan di mas bieu di Boneiru pa kolektá kantikanan di e era di katibu. Francisca Sint Jago, un di e kantantenan di e kor, ta konta: “Nos a kolektá letra, melodia i ritmo ku nan por a kòrda ainda, òf ku nan mayornan òf nan welonan a skirbi ainda.” Antayera, djamars 14 di novèmber, e grandinan di Hòfi Kultural a presentá e kansionnan akí durante un konsierto di apertura. E aña benidero nan lo organisá un seri di konsierto na diferente lokalidat riba e isla bou di e nòmber Músika di Sklabitut Boneiru (MdSB). 

Rekordá sklabitut ku kantikanan animá 

E grandinan di Hòfi Kultural a praktiká pa lunanan largu i esei tabata bon riparabel. E konsierto a zona tremendamente. Grandinan na blanku, ku instrumentonan dòrná ku flor tabata toka, supla i kanta. Esaki a bira un atardi espléndido, yen di alegria i sonrisa riba kara despues di kada aplouso meresí. Chon Theodora a hiba e públiko entre e kantikanan den un forma narativo te na tempu di sklabitut i a splika e letranan di e kantikanan. Nan a presentá kantikanan di protesta, di lamento, pero tambe kantikanan ku un nota alegre. “E kantika akí yama Malo Malaye, e ta trata di un buriku i un baka ku ta tenta otro. E baka ta bisa ku e buriku ta bobo pasobra e ta sigui traha asina duru. E buriku ta mama gai di e baka bèk ku pronto e lo ta riba e barbakoa.” 

Si bo dal e mucha, mi ta dal bo bèk 

E promé konsierto tabata pa invitadonan manera gezaghèber Nolly Oleana i diputado Nina den Heyer. Ora di e pregunta kua kantika el a gusta mas, señora Den Heyer no mester a pensa muchu. Si bo dal e mucha, mi ta dal bo bèk. Si bo dal e mucha hòmber, mi ta dal bo bèk. Tin un dicho ta bini dilanti ku ami no tabata konosé ainda: Su pishi a bora tera kaba, “zijn plas heeft de grond al doorboord”. Pues no ta djis un awa slap, pero un stral ku ta traha buraku den suela. Ku esaki ta bisa ku e mucha hòmber no ta un mucha chikitu mas.’ 

Kantikanan di sklabitut hopi biaha tabata ritmonan entusiasmá, infeksioso riba e kadans di e trabou. Tirando chapi, kanando i batiendo pia abou e katibunan tabata kanta pa enkurashá otro. Francis Domacassé a trese e kantikanan na bida ku su bos kargá i enkantá. E públiko a kanta koro ku refran for di e promé kantika. Abo tambe ke bishitá un konsierto? Pa e último informashon bishitá e página di Facebook di Hòfi Kultural: https://www.facebook.com/HofiKultural 

Músika di Sklabitut Boneiru (MdSB) ta un inisiativa di Fundashon Plataforma Kultural (FPK) den kuadro di e aña Konmemorativo di Pasado di Sklabitut. Te ku zomer di 2024, e grandinan di Hòfi Kultural lo duna un seri di konsierto na vários lokalidat na Boneiru. Algun di e konsiertonan ta forma parti di e programa di Terramar Museum, ku a bira posibel pa medio di fondo di Fonds voor Cultuurparticipatie. Esaki a konta tambe pa e konsierto di apertura ku e tema di Patrimonio Kultural. 

Partnernan di e proyekto akí ta: Terramar Museum, Jong Bonaire, Arte di Palabra, Hòfi Kultural, Kanta Orkidia Rincon,Entidat Públiko Boneiru (EPB), Herdenkingsjaar Slavernijverleden (Aña Konmemorativo di Pasado di Sklabitut), Plataforma NGO i Ninsee.