BÁNDABOU – Un tragedia a asotá e bunita Parke Nashonal Hòfi Mango na Kòrsou, despues ku yobida fuerte a okashoná ku un dam a kibra i a hasi hopi daño. Jandino Asporaat, ku a konstruí e parke huntu ku su ruman Kenneth, ta hopi preukupá pa e situashon i ta hasi un yamada  dramátiko pa tuma akshon urgente pa prevení mas desaster. 

“A logra evakuá nos gerente i su famia nèt na tempu. Nosta konbibí ku tur víktima di Bándabou i ta spera ku e desaster aki lo keda limitá na e daño material enorme aki i ku e lo no eksigí bida di hende,” Jandino a kompartí preukupá riba Instagram.

Pa hopi hende e no ta un sorpresa ku e akontesimentunan resien tin di haber ku negligensia pa añanan largu di damnan i infrastruktura na Bándabou. “Hopi di bosa sa ku pa motibu di nos amor i responsabilidat pa Kòrsou, nos tin añanan kaba ta boga pa bini ku un plan kompleto di rehabilitashon i mantenshon di e dam- i roinan na Bándabou.”

“E último sinku añanan nos a lucha ku sanger, sodó i lágrima pa hasi di Hòfi Mango un bunita parke nashonal i invertí den Bándabou. Si no tuma e medidanan nesesario rònt di nos ku ta importante pa e infrastruktura i seguridat di e área, lo ta literalmente karga awa hiba laman,” Jandino a enfatisá.

E akontesimentunan trágiko di e dianan aki ta suprayá e nesesidat urgente pa tuma akshon. Jandino a papia kaba ku prome minister Pisas i a ofresé su sosten pa yuda lidia ku e situashon.

“Mi a papia ku Minister President Pisas riba e seriedat di e situashon i a bisa ku nos ta pará kla pa sostené i tuma akshon. Ya pa desenia largu ta pusha e problema dilanti. E echo ku no a lidia kuné ta fatal pa nos awor. Laga nos uni awor i solushon’é pa awor i semper,” Jandino a insistí.