Kralendijk – Sekshon di Kultura Arte i Literatura, SKAL, den su afan pa sigui establesé kontakto ku organisashonnan ku ta profilá den sektor kultural, ta organisá algun enkuentro bou di e nòmber ban topa SKAL.

E meta ta pa interkambiá di idea i plannan riba tereno kultural di manera ku por yega na un maneho ku un base fuerte pa konservashon di nos kustumbernan, mantenshon di nos kultura bibu i sigui desaroyá arte i kultura na Boneiru. Mas aleu e intenshon ta pa estrechá kolaborashon entre instansianan i duna aporte pa haña mas informashon pa loke ta trata arte i kultura.

Durante di e dia aki nos lo para ketu na algun tema ku tin den nos plan di akshon di kultura i nos lo bai evaluá esaki konhuntamente.

Temanan ku lo bin dilanti ta:

• mantenshon, protekshon, desaroyo i promoshon di patrimonio kultural
• fasilitashon i promoshon di ekspreshonnan kultural artístiko
• promoshon di edukashon koperashon kultural
• mehorashon di infrastruktura kultural

E siguiente aktividat ta tuma lugá djabièrnè 22 di aprel den sala di konferensia na Captain Don’s Habitat. E enkuentro aki ta kuminsá mitar di nuebe di mainta i ta dura te ku tres’or di tra’i mèrdia.

Ta di sumo importansia pa traha huntu pa loke ta trata nos kultura i arte, p’esei ta importante pa partisipá na e enkuentronan aki.

Representantenan di organisashonnan den sektor di kultura i arte por konfirmá nan partisipashon na e-mail [email protected], mas tardá 11 di aprel 2022.