KRALENDIJK- Aktualmente ta tumando lugá un estudio tokante uso di idioma na Boneiru, pa asina gobièrnu di Boneiru por fiha un maneho di idioma ofisial. 

Fundashon Akademia Papiamentu a haña e mandato di gobièrnu di Boneiru pa laga desaroyá un plan di maneho di idioma pa e isla. Pa ehekutá e tarea aki , e Fundashon a kontrae ekspertisio di Nick Faraclas  (Universidat di Puerto Rico), Ellen-Petra Kester (Universidat di Utrecht) i Eric Mijts (Universidat di Aruba) pa hasi un investigashon komo base pa un maneho di idioma inklusivo pa Boneiru.

Pa por a ehekutá e investigashon e tim a bishitá Boneiru dos biaha. Nan a kolektá informashon for di e komunidat Boneriano i spesífikamente di esnan den sektor di enseñansa i otro grupo di enfoke. 

Entrevista

Djaluna mainta Awor.nu tabata tin un entrevista estrecho ku Elsemarie Beukenboom, di Fundashon Akademia di Papiamentu, huntu ku Eric Mijts pa haña mas splikashon tokante e estudio i e proyekto den su totalidat. 

“For di 10/10/10 por bisa ku leinan ku tabata konta pa Antia Hulandes, tambe ora ta trata di idioma, no tabata konta mas pa Boneiru”, asina Beukenboom a splika. “I kada bes ku nos tabata ke papia ku mandatarionan òf ministerionan konserní tabata skucha ku Boneiru no tin un maneho establesé pa loke ta trata idioma, i pa e motibu ei no por hasi nada pa protekshon di nos Papiamentu, por ehèmpel, asina Beukenboom a splika. 

Erik Mijts a splike tokante e estudio, kaminda ta akumulá mas tantu informashon posibel. Asina a saka un enkuesta ku a wòrdu yená dor di 660 habitante. Tambe a bai e diferente skolnan pa establesé kon bon òf kon malu e dominio di Papiamentu i otro idioma ta, na e diferente nivel di skol. 

Den esaki a pidi studiante pa evaluá nan mes, kon bon nan ta dominá sinku aspekto di e idioma. 

Resultado

Pronto lo presentá e promé resultado ku mandatarionan, pa despues publiká e konkluson i rekomendashonnan mas importante.

Según Mijts, ya a akumulá un kantidat enorme di informashon balioso. E estudio a dura masomenos 6 luna, i pronto e promé fase lo yega su fin. 

Mijts tambe a indiká ku e problema ta grandi. “Ora bo ta papia ku organisashonnan manera polis, pero tambe hospital, bo ta skucha kada bes ku tin un grupo mas i mas grandi, ku hinter día ta besig ta tradusí di Papiamentu pa Hulandes, i vise versa, sin ku nan por hasi nan trabou mes”, según Mijts a konta. 

Fundashon Akademia Papiamentu ta konsistí di un grupo basta grandi di boluntario ku ta lucha, no solamente pa haña mas rekonosimentu pa e idioma Papiamentu, pero tambe pa protehá e idioma di bira un idioma ku un minoria di hende na Boneiru ta papia.