Willemstad- Djarason den oranan lat di atardi, e kompania di aviashon EZ Air a risibí su promé avion nobo i mas grandi di e marka Saab. E Saab340B+ ku tin 34 stul, ta karga kasi dòbel e kantidat di pasahero di e avionnan aktual ku tin 18 stul. E inkorporashon di e avion nobo nan ta nifiká kun oumento di kapasidat basta drástiko pa EZ Air.

Un periodo di preparashon di algun luna a perkurá ku EZ Air tabata kla pa a trese e promé avion nobo abou. “E avion pasa e avion den un programa rigoroso di manteshon pa asigurá ku tur kos tan den un kondishon 100%, nos a pintele na nos kolónan i nos pilotnan mester a bai nan trainen di ‘simulator’ pa siña operá e avion aki, asina direktor di EZ Air, René Winkel a splika.

Stiwardès

Dor di e grandura di e avion nobo, pa di promé biaha EZ Air lo empleá un kantidat di stiwart i stiwardès. Dor si di su grandura i kantidat di pasahero ku e ta karga, e avionnan aki lo operá ku 1 personal di kabina na bordo. Un promé grupo di stiwart i stewardès a bai trainen na Miami algun siman pasá, pa siña tur detaye di trahamentu na bordo di e Saab.

Awor ku e avion yega Kòrsou falta algun tramite pa por tuma e avion den operashon. E avion lo wòrdu usá primeramente pa buelonan entre e islanan ABC i riba ruta pa Colombia i despues lo sigui ekspandé pa mas destinashon nobo tambe.