KRALENDIJK- Ku e dianan di fiesta na kaminda, entidat públiko Boneiru (EPB) ta hasi un yamada riba habitante i bishitantenan pa tene kuenta ku bienestar di nos bestianan. 

Kambio di aña ta un periodo festivo, pero e por sòru pa strès i peliger tambe pa e bestianan na nos isla. Pa e motibu aki, gobièrnu ta pone énfasis riba importansia di komportashon responsabel pa limitá e impakto riba bienestar di nos bestianan.

Gobièrnu ta mustra tambe riba e echo ku sonido duru i lus skèrpi di vürwèrk ta duna hopi bestia hopi strès. Esaki por kondusí na reakshon di pániko, herida i miedu duradero. “Pa e motibu akí entidat públiko Boneiru ta urgi tur hende pa hasi uso responsabel di vürwèrk pa tantu hende komo bestia”, asina por lesa den un komunikado ku gobièrnu a saka djaluna.

Na mes momentu ti sierto kos ku por hasi pa minimalisá e molèster pa animal, manera tene e bestia paden, usa solamente vürwèrk legal i sende esaki durante oranan ku ta pèrmití vürwèrk, evitá uso di tiru duru i paga tinu na señal ku e vürwèrk ta afektá e animal. 

Mèldumentu

EPB ta hasi un apelashon riba tur hende pa mèldu bestia heridá òf bestia konfundí mesora serka Protekshon di Bestia Boneiru (Dierenbescherming Bonaire) òf otro instansianan relevante.