DEN HAAG- Tres hóben Boneriano a partisipá resientemente ku otro hóbennan di St. Eustatius i Saba riba e temátika di diskriminashon i rasismo. 

E kombersashonnan a tuma lugá bou di kordinashon di kordinadó kontra di rasismo i diskriminashon na Hulanda, Rabin Badewsingh. 

E kombersashonnan a bira posibel dor di Unicef Hulanda i tambe fundashon WeConnect. E hóbennan a papia ku otro entre otro riba señalnan di diskriminashon den nan propio ambiente, i tambe riba manera pa prevení ku hóbennan ta keda ekskluí pa via di sea rasismo òf diskriminashon. 

Boneiru

E hóbennan di Boneiru a papia entre otro riba importansia di idioma. Kontrali na e situashon na Kòrsou i Aruba, muchanan di skol nan Boneiru mester siña hulandes promé ku nan haña enseñansa den nan idioma materna. Esaki ta kousa ku hopi hóben no ta dominá ningun idioma 100%. 

Esaki por ta un barera na e momento ku e hóben ta bai den eskterior pa sigui estudionan mas avansá. Tambe a papia riba difikultatnan ku hóbennan di Boneiru ta enkontrá pa haña un kamber ora di bai studia na Hulanda.