Hopi but pa manehá sin faha di seguridat

Kralendijk- Riba djaluna 12 i djamars 13 di aprel, durante di kòntròlnan di tráfiko rutinario na diferente sitio, a duna mas i mas shofùr but dor ku nan tabata kore sin dokumentu di seguro bálido, sin reibeweis válido, pa manehá den direkshon prohibí, pa kore ku lus di patras defekto i pa uzo di telefòn bou di stür. Partikularmente pa manehá sin faha di seguridat bisti mayoria biaha a duna but.

A duna un total di 25 prosès ferbal. A duna prosès ferbal pa e siguiente violashonnan:

18x manehá sin faha di seguridat bisti

5 x manehá sin seguro

3 x manehá sin reibeweis

4 x uzo di telefòn bou di stür

3 x manehá den direkshon prohibí

1 x manehá ku lus di patras defekto

Faha

Polis ta rekòrdá outomobilistanan pa bisti nan faha pa nan mes seguridat. Un faha di seguridat ta protehá okupante di un outo durante di un aksidente. Dor di uza e faha e persona protehá ta keda sinta riba su stul, no tin e posibilidat pa dal su kabes den winshil i no ta keda bentá den e outo p’aki p’aya. Dor di bisti bo faha di seguridat bo chèns di tin un aksidente mortal ta baha ku 30 pa 40%. Tambe patras den outo bo tin 20% ménos chèns di keda herida seriamente ora bo tin bo faha bistí.

Dokumentu

KPCN ta hala atenshon tambe di un i tur pa nan tin e dokumentunan nesesario manera menshoná akiriba, na òrdu. Tambe ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.