Boneiru

Inflashon na Hulanda Karibense ta subi

Kralendijk – Den di dos kuartal di 2021 merkansia- i servisionan di konsumidó na Boneiru tabata 0,2 porshento mas karu ku un aña anterior. Den e promé kuartal inflashon tabata -3,2 porshento. Na Sint Eustatius e preisnan a baha ku 1,2 porshento riba base anual, siendo ku den e promé kuartal e preisnan a baha ku 4,1 porshento. Na Saba inflashon a subi di -1,3 porshento na 1,0 porshento den e di dos kuartal. CBS ta anunsiá esaki basá riba e índise di preis di konsumidó Hulanda Karibense.

Riba tur tres isla inflashon a oumentá kompará ku e promé kuartal di 2021. Aki ta hunga un ròl tambe ku e efekto di e kompensashon[1] pa koriente, awa i internèt ta ménos grandi kompará ku e mes kuartal aña pasá. Gobièrnu ta suministrá e kompensashonnan akí desde mei aña pasá. E medidanan tin influensia pues riba e preisnan tantu den e di dos kuartal di 2020 komo den e di dos kuartal di 2021. Pa Sint Eustatius i Saba desde yanüari 2021 tin un supsidio adishonal riba internèt na vigor di 20 USD pa kas di famia pa Sint Eustatius i 10 USD pa Saba.

Inflashon Boneiru 0,2 porshento

E oumentu di inflashon na Boneiru kompará ku e mes kuartal aña pasá ta okashoná partikularmente pa un subida di e gastunan pa bibienda. E hürnan ta 10,2 porshento mas haltu ku den e di dos kuartal di 2020. Esaki ta ser okashoná dor di introdukshon di e Wet maatregelen huurwoningmarkt Caribisch Nederland[2] pa Boneiru entrante promé di aprel 2021. Eventual kompensashon pa hür sosial no ta inkorporá den kalkulashon di e índise di preis. CBS ta konsiderá e kompensashon di hür akí komo traspaso di entrada individual.

Kompará ku un kuartal anterior e preisnan na Boneiru den e di dos kuartal di 2021 a subi promedio ku 1,5 porshento. E hürnan a subi ku 9,8 porshento kompará ku kuartal anterior. Preisnan di kombustibel tambe a subi. E gastunan pa transporte a oumentá ku 3,6 porshento pa motibu di un subida di preis pa gasolin i disel. E preisnan pa remedi ku por kumpra sin resèpt a subi ku 6,7 porshento.

E preis promedio pa alimentashon a keda bastante stabil kompará ku un kuartal anterior, ounke e preisnan pa fruta fresku a subi ku 5,4 porshento i di bèrdura ku 2,6 porshento.

Inflashon a oumentá na Sint Eustatius

Preisnan di konsumidó na Sint Eustatius tabata den e dos kuartal di 2021, 1,2 porshento mas abou ku un aña anterior. Den e promé kuartal di 2021 e bahada tabata 4,1 porshento.

Den di dos kuartal konsumidó mester a paga 0,9 porshento mas ku un kuartal anterior. Transporte a bira 4,7 porshento mas karu komo ku preis di gasolin i disel a subi.

Inflashon ta subi na Saba

Na Saba den di dos kuartal di 2021 konsumidó mester a paga 1,0 porshento mas kompará ku un aña anterior. Den e promé kuartal di 2021 inflashon ainda tabata -1,3 porshento.

Den di dos kuartal preisnan di konsumidó tabata 1,5 porshento mas haltu ku un kuartal anterior. Transporte a bira 5,7 porshento mas karu pa motibu di subida di preis di gasolin i disel. Preis di artíkulo pa higiena personal a subi ku 3,4 porshento kompará ku e promé kuartal di 2021.

Sifranan tentativo

E sifranan tokante e di dos kuartal di 2021 ta tentativo i lo stipulá nan definitivamente ora di publiká tokante e di tres kuartal di 2021.

Fuentenan:

StatLine: Caribisch Nederland; consumentenprijsindex

https://opendata.cbs.nl/#/CBS/nl/dataset/84046NED/table?dl=BFA9


[1] Informashon tokante kompensashon pa koriente, awa i internèt: https://papiamentu.rijksdienstcn.com/aktual/notisia/2020/mei/5/alivio-finansiero-pa-famia-i-kompanianan-na-hulanda-karibense

[2] Lei medidanan merkado di kasnan di hür Hulanda Karibense: https://wetten.overheid.nl/BWBR0039553/2021-04-01


Lesa tambe:

Deel dit artikel
Rocargo
Rocargo
Rocargo
Rocargo