KRALENDIJK – John Soliano lo wòrdu nombrá komo e gezaghèber nobo di Boneiru. Staatssecretaris Alexandra van Huffelen a proponé su nombramentu den e konseho di minister.

Redakshon di ABC Online Media a skucha sonido for di siman pasá ku e siman aki lo tin un presentashon di un gezaghèber nobo. E nombramentu di Soliano lo drenta na vigor dia promé di ougùstùs 2024. John Soliano (52), nasé na Boneiru, tin un karera impresionante. Notabel ta ku e gezaghèber nobo resientemente a drente den servisio di Entidat Públiko Boneiru (EPB) komo direktor di e departamento di maneho i sosten.

Promé ku esaki el a traha entre otro 6 aña komo mènedjer di Orco Bank Bonaire i di 2012 pa 2016 komo direktor responsabel pa reorganisashon di Bonaire Holding Maatschappij (BHM). El a fungi den diferente funshon komo mènedjer interino i mènedjer di rekurso humano entre otro na Kompania di telefonía Boneriano (Bonairiaanse telecombedrijf, Telbo N.V.) i Water- en Energiebedrijf Bonaire (WEB).
Soliano a studia ‘Personeel en Arbeid’ na Hogeschool West Brabant i a logra su Masters of Arts in Managing Human Resources na Universty of the West of England.

E nombramentu di Soliano komo gezaghèber di Boneiru ta drenta na vigor riba promé di ougùstùs 2024.